سبَدر شبیر
میہ عشقہ نار زجنم یارن تن
داد لد دل چَھم گمژ پوٗرٕ ہن ہن
ینہٕ جائے کٔرمے تس در من
دادۍلدچَھم گمژپوٗرٕ ہن ہن
نوٗرن صوٗر کور کوه طورس
موسیؑ مشتاق گوو ظہورس
نیاے چُھنہٕ انزران در بدن
داد لد چَھم گمژ پوٗر ہن ہن
نَے ہند سوز چُھے پرتھ درگاہ
پردن أندرے چُھے شہنشاہ
تٔمی سُند پرتو شین طرفن
داد لد چَھم گمژ پوٗرٕ ہن ہن
نابوٗد آدمس کورنے بوٗد
تٔمی سوٗز مہر کنی نبیؐس دروٗد
شیچھ ؤنی ہوہس تتہِ صرفن
دأد لد چَھم گمژ پوٗر ہن ہن
حض آدمؑ ییلہ جنتس ژاو
جنتس لیکھِتی اوس محؐمد سُند ناو
تہِ ؤچھتھ آدمؑ گوو حارتن
داد لد چَھم گمژ پوٗر ہن ہن
جنتہٕ منزحضآدمؑ نیبر کڈنہٕ آو
دنی یاہ ؤچھنے سرون صحراو
یَژکالی توبہ قبول کورُس ذاتن
داد لد چَھم گمژ پوٗر ہن ہن
حض آدمسؑ ہابیل قابیل زاو
قابیلس قاتل پیوس ناو
یژکالی کاون کاوہ کورنے دفن
داد لد چَھم گمژ پوٗر ہن ہن
حض آدمنؑ سفرہ ؤچھنے کریوٗٹھ
دنی یاہ چُھنہٕ کانسہِ کیوت میوٗٹھ
عملہ رژ کر جنتس بیہ سوزن
داد لد چَھم گمژ پوٗر ہن ہن
ووجود آدم چُھے نون اثبات
توے آو بناونہٕ دۄوہ تہ راتھ
خبر ناو تھاونے تٔمی ملکن
داد لد چَھم گمژ پوٗر ہن ہن
انبیا، اولیا سبَدر کتی آیہ
ولِہ ولِہ حضرات واپس درایہ
وصل گوو یمن ستی بس عاشقن
داد لد چَھم گمژ پوٗر ہن ہن
