بشیر اطہر
7006259067
اختر اوس شاہ ماسہ ہُند ژورو کوریو پتہ کُنے نیچُو سُہ اوس مول مرنہ پتہ تریہہ ریت زامت. اوہ کنی اوس سُہ شاہ ماسہ تِہ واریاہ ٹوٹھ تہ پننہ نین بینین تِہ….. بینہ آسس ونان سون اختر بَنہ اَسہ بؤڈ افسر پتہ ژَلہ اَسہ سارے سختی…… اماپوز اختر اوس یمن اَتھ کتھہ پیٹھ اَسن کھنگالہ تراوان….. شاہ ماسہ واجِہ کورِہ نَخہ ڈکھہ تہ پنُن سورُے زون لوگُن اخترس دیُن…. اختر تہ رود بڑان تہ امسندین خابن تہ لجہ پکھہ یِنہ۔سُہ اوس گَرا کاغزس ناو بناوان تہ گرا جہاز ۔مگر ناو دریاوس تراوتھ اوس سُہ سیٹھادل ملول گژھان تہ اوس متی پاٹھی اَتھ ناوِہ لورہ دِوان تہ دریاوس پھاٹوان اماپوز جہازس اوس سیٹھا شوقہ سان چلاوان….. ہررررررر،،،،، ؠمیانہ خدایہ اخترس دِم اتھ وُڈوس پکھہ تاکہ یہ تہ وُڈہ ہا شاہ ماسہ اوس یہ دعا پرؠتھ ساتہ وُٹھن پیٹھ آسان…..
ہے! بیقلی اتھ وُڈوس تہ اتھ خابس ہائی گژھن نَرہ آسنِہ یمہ امِس بچارس زینہ برونٹھے ژھینہ….. زنتہ آسہ یمہ کتھہ شاہ ماسہ پَنن خانہ دار رزاق پُہل ونان تہ شاہ ماسہ اوس اوش ددرایہ وسان…… موجی ژے کیازِ چُھے اوش وسان…. اختر اوس موسوم پاٹھی پننہ ماجہ یہ سوال پرژھان……
نا! گوبرا بہ کیازِ وَدہ میہ کیا چُھ ودُن لایق گومت.شاہ ماس آسس ونان زنتہ کِہن اوس نہ گومُت…..
آ!! میہ چھے پے ژہ کیازِ چھیکھ ودان اختر اوس پننہ شُری باشہ کران کران ونان….. ژہ چھیکھ نا ببس پراران. ژہ وُچھ اکہ دوہہ گژھہ بہ پَنُن جہازہ ہیتھ تہ بہ اَنن سُہ تتھی منز واپس….. اخترن ییلہ تہ سوال اوس کورمُت زِ میہ کتہ بَب تس اوسٗکھ ہمیشہ یہ وونمُت زِ تَسُند بب چُھ دور گام تراوتھ مُزوری کرنِہ گومُت. سُہ اَنہ تورہ روپیہ کوم تہ پتہ بناوو اسی مکانہ تہ بیہ اَنو جہاز…… مگر شُرؠن کیا پے یِمہ چِھ آسان بے خبر یمن ہُند دنیا چُھ آسان بوڈ،خاب بیتری تہ چِھ آسان بٔڑی.شاہ ماس تہ آس اخترُن خاب پورہ کَرُن اما پوز سلام سرپنچس آس نہ یہ کتھ رَتِھہ کھسان سُہ اوس شاہ ماسس ٹسنہ کران تہ ونان…. ہے دوپمے ہے شاہے تَلے مہ آس یمہ بڈی خاب وُچھان یِمن لوکچین خام پارین ہندی خاب ہے چِھ یہندی پاٹھی خام آسان، یِتھی خاب چِھ بڑین بڑین محلہ خانن منز وُچھنہ یوان. سلام سرپنچ سُند بنیادی مقصد اوس زِ اختربناون بہ پانس طلبہ موہنیو تہ شاہ تِہ نِمن گھرے،اکھ رچِھ اختر چَوچاروائی تہ بیہ کرہ بو شاہس ساتی کھاندر مگر شاہ ماس آس نہ یہ مانان…….ہیو سلاما ژے پییاہ کاژہ تمبر ژے ہا شوبے بہ کُور، اَمُیک مطلب کیاہ چُھ اگرچہ میہ لوکچے ڈیکہ لون روو…….سلام سرپنچ اوس تس ہمیشہ یہ ونِتھ دل تنگ کران زِ “شکس لَدس تہ وازہ بتَس چھے آسان خر”اماپوز شاہ ماسہ اوس نہ تَسُند یہ وَنُن ٹارہ کھسان تہ آسس ونان،”ژہ وُچھکھ اَکہ دوہہ پانے ییلہ میون اختر پائلاٹ بنہ” اَوے پھرررررر، ،،،،، ییتہ نہ میون بیٹہ صاب تتہ گو چون اختر، شکس لَد شُری کر آس پران “سلام سرپنچ اوسس شرارتہ سان در جواب ونان…… سلام سرپنچس آس خبر زِ قابلیت چھے صرف امیر شُرن منز آسان….. سُہ اوس یِتھ ٹسولہ وانہ پینجن پیٹھ تہ کران تہ آخرس تنگ یِتھ درایہ شاہ ماس اختر ہیتھ پَنُن گر تراوتھ دور کتھ تام شہرس کُن ……شہر اوس سیٹھا آوُر اتہ اوس نہ کانہہ کانسہ پرژھان، زنتہ اوس شہرس شاہمارو نال وولمُت تہ لُکھ آسی ژلنچ کوشش کران…… دوہس وانہ وانہ پھیرِتھ گُزار یہ راتھ شاہ ماسہ تہ اخترن أکِس وانہ تھرس پیٹھ اما پوز اُمن آس نہ شہرچ پے زِ شہرس منز چِھ سلام سرپنچس ہِوی کینہہ کمین تہ آسان…… سحر موقہ واتِتھ گیہ یِمن کتھہ کَنن گے نندرِ بیدار تہ اَتہ وُچِھکھ نفر ژومبرہ سڑکہ پکان اَکھ أکِس ستی ناچاقی کران تہ بڑِہ بڑِہ کیاہ تام ونان…… اختر تھاریو تہ ژجس کریکھ نیرِتھ…….. یمہ نفر دورے تہ کھتی وانہ تھرس پیٹھ…….خشمہ ہتی، اچھ وَزجہ، اتھن ژور ژور کری لاگتھ ییلہ یمن شاہ ماسہ کُن نظر پییہ تِمہ گے رہتھ…… ہاہاہاہا اَز بنیو اَسہ مال…… عاش ہا کرو عاش،،،،،، شاہ ماس وَژھ تہ روٹن اختر کھونہ منز تہ دورے یہ وانہ کِس کُونس کُن مگر اکی جوانن دِژس پوت پلوس تَھپھ تہ پَلوس گیہ تُرپچہ…… ہے توہہ چھو نا پننہ ماجہ تہ بینِہ تلسا مہ کریو زیادتی….. ہے کُنہ کانہہ چُھو نا….. ہونیو لوگ وُنگُن مگر انسانو منزہ کھول نہ کانسہ اکی شاہ.سڑکہ اپور کُن اوس اکھ بوڈ مکانہ ییمِچ دآر ییلے آس مگر کُس تام شخص آو اندری تہ کرن یہ دار تہ بند، زنتہ اوس اتھ شہرس آلی ناش گومت،،،،، اخترن ییلہ پننہ ماجہ ہنزی یہ بے بسی وُچھ سُہ لاریاو سڑکہ کُن تہ انِن کنی تہ ترووُن اکس نفرس کنہ ہُند ٹاس تہ سُہ پیو پتھر مگر بیکِس نفرس گو نہ یہ برداش تہ تمی ہیژ اخترس اتھہ منزہ کنی تہ ہیوتنَس کنہ ساتھی کَلہ دَگُن مگر ماجین کَر چُھ یوان تاب شاہ ماس وژھ تھود تہ دِتُن اخترس پیٹھ پان برتھ مگر امی نفرن اوس اَمہ برونہے اخترس کَلس ٹاس ترومُت….. ییلہ یمو نفرو وُچھ اخترس خون جاری گژھان تِمو دِژ کُنی ووٹھ تہ ژلی واوکی پاٹھی،،،،،، ییلہ شاہ ماسہ اخترن کلہ کھونہ منز روٹ تس اوس رَتھ پشپان مگر کَجہ زبانی منز اوس ماجہ ونان زِ بَہ اوس سے نا ونان زِ بہ گژھے پُنن جہازہ یتھ ببس نِش تہ اَنن گرہ واپس اَز دراسے بہ…….. یہ ونان ونان ژول اخترس زُو نیرِتھ تہ شاہ ماس گیہ رَہتھ،نہ چشمن منز اوش، نہ کانہہ گراو تہ نہ کانہہ غم….. سو رٗوز اخترس تَھلہ تَھلہ وُچھان،،،،،، آفتاب کھوت مگر شہرہ منزہ پُرژھ نہ کانسہ اَکی زِ سحر وقتس کیاہ سپدیاو،،،،،،، زنتہ کانسے اوس نہ کینہہ بوزمُت تہ نہ وُچھ کانسہ کینہہ…… شاہ ماسہ ژُھن اختر اَتی تراوتھ تہ درایہ بے خبر پاٹھی تمے ژھینمتی جامہ لاگتھ خبر کتھ شہرس کُن…… مگر شہرکی لُکن چِھے اَز تہ پریتھ سحرس یمہ آوازہ کَنن گژھان زِ ییم شہرن مور میون اختر……..
