تمی سُند حسن
راحت رفیق
یتھی وچھم سہ بالیار
ٲچھن میہ آو نو بہار
دلن میہ کور تیتھی قرار
سہ چھم میہ آدنک یار
پکاں چھہ زن عطر مٔلتھ
جامہ زن چھ گل ؤلتھ
بومہ کمان تمس رلتھ
مے حیس تہ ہوش گو ڈلتھ
شوب دار ببرِ تن
حسن دیُتی یہ قدرتن
عاشَق گمتی چھُ حارٕتن
یُتھی وچھکھ یہ گلبدن
یہ گل وناں چھ بلبلَس
شمع وناں چھہ پوںپرَس
بہ کیا دزس بہ ما مَرس
سوری خطا محبتس
وٹھ تمس گلاب کیا
حسن چھ کیا شباب کیا
کتھن وزاں رباب کیا
سوال کیا جواب کیا
پکان ییلہ چھ رہگزر
ہٹاں چھے ما تمن نظر
گژھاں دلس عجب اثر
فقط ونے میہ آو مژر
یوتاہ مسا پاراو کر
ہنا ژٕ بس ٹھہراو کر
وندے پنن جان و جگر
وَ چھم لیکھن اکُی مصر
ڈیکہ تمس چھ کیا گہاں
عاشقن چھ دل پھولان
یمبرزلے بومُبر ونان
چھ پار پار عشق کران
سہ ییلہ چھنا غزل گیوآں
چھے زیر سازسی لگان
چھے رونی تمس ہٹس وزان
چھے ککلہٕ تاں رہتھ گژھان
