غزل
بلال صہبا
جام خالی ہے صراحی دوٗر ہے
نوش کی ہے نا نشے میں چوٗر ہے
گِر رہا ہے اشک پیہم آنکھ سے
درد سے دل اس قدر رنجور ہے
برق سے یکلخت میں جو راکھ ہو
لن ترانى کا نہیں یہ طوٗر ہے
ہم بھی ان کے دید کے مشتاق ہیں
کیا بتائیں وہ کہاں مستوٗر ہے
دیر میں وہ نا ملا ہے حرم میں
نحن اقرب سے سنا مشہوٗر ہے
ایسی باتیں غیر کیا جانے بھلا
دل نہیں جب عشق سے معموٗر ہے
راز سارا کھولتا صہبا مگر
واقعہ منصوٗر سے مجبوٗر ہے
