سبَدر شبیر۔۔۔اوٹو اہربل
یہِ چَھم چانی مہربانی مہربان خۄدایہ
بہٕ پاد کورتھس ژے انسان خۄدایہ
بہٕ چُھس بندٕ چونٔے ژٕ میون ربِ رحیم
ژٕ رحم میہ کرتم رحمان خۄدایہ
بہٕ ینہٕ پادٕ کورتھس تَنے چُھم میہ غفلت
میہ کرتم عَطاء ؤنی ایٖمَان خۄدایہ
یہِ دُنیا چُھ فانی میہ کٔرۍ زایہ جوانی
میہ کرتم نظرِ ثانی بیہ احسان خۄدایہ
بہٕ دوٗر روٗدس ژینش دوہس راتس
بہٕ گومُت چُھس ؤنی پشیمان خۄدایہ
چِھ رحمت ؤسِی چانی ژٕ بوز صدا میانی
میہ کرٔزیم تتہِ، یتہِ شَاد مان خۄدایہ
بَہ در دُنیاہ پادٕ کورتھس بشر
بَہ در روزِ محشر تُلزیم با ایمان خۄدایہ
بہٕ مَنگہا رات راتس ژے ذاتِ پاکس
میہ کرتم عطاء سُےشمع دان خۄدایہ
بہٕ ذالس خوٗن جِگرُک سُہ وقت آسن دِگرُک
میہ کاستم دِلٕکی ساری ارمان خۄدایہ
چُھ سبَدرس دل بے تاب ییلہِ ہینم حساب
میہ گۄژھ آسن نبی دیٖدمان خۄدایہ
