کلام:آفاقؔ دلنوی
کاؤ تہ کوٗتُر ژَرِ آلِس منز کرتھ قرار
معنے ژاراں اَتھ گاٹلی تے بینا دار
آب وناں یَتھ کوچھِ للناواں ہوا تہ نار
معنے ژاراں اَتھ گاٹلی تے بینا دار
آبچ مِلون تن سگناواں رَحمس منز
تِی سَپداں یِہ نہ آساں وہم و گمانس منز
پھسہِ منز نیراں لذت لَژھِ منز مُہر تہ دیار
معنے ژاراں اَتھ گاٹلی تے بینا دار
چُھ نہ یہ کراں کانہہ پوز تیمسنز اکھ یکتا ذات
راتس سپداں دوہ تے دوہس سپداں راتھ
خاکہ اندر پھولراواں سوئ گُل تے گلزار
معنے ژاراں اَتھ گاٹلی تے بینا دار
افتابس کوس رہناواں اتھ غور ژ کر
لٹھ ژندرس کوس نپناواں یہِ تہِ وار ژ سر
آدم اکھ صورت بیون بیون کیمی سنُد شہکار
معنے ژاراں اَتھ گاٹلی تے بینا دار
ماز چُھ مازَس ژاپن دئ دئ نینگلاواں
پان چُھ پانس پانے ہنہِ ہنہِ پژناواں
نفع تہِ چُھس نقصانی ہے ہے کیوتھ گٹکار
معنے ژاراں اَتھ گاٹلی تے بینا دار
آفاقؔ دلنوی ۔۔۔۔۔دلنہ بارہمولہ کشمیر
فون نمبر 7006087277
