فاروق شاہین
از گے نہ مے صبحے بانگ کنن
ہے جانانو کانہہ خبرا ون
پرتھ دآر وژھے آس شہرس منز
کانہہ نفرے چھنہ اتہ سڑکہ پکاں
گے لکھ کوت تہ کوت گے جاناوار
چھس پرژھیون پیومت شہرس منز
کس واو چھ وولیومت کوچن
نہ چھ ڈل بٹھ پکنک ستھ تہ صدا
نہ چھ گامس اژنک کانہہ وتہ پود
گے لارکی دار تہ دارکی لار
دروازن مری متی اشتہار
چھنہ وانہ پینجن پیٹھ کانہہ دربار
خاموش فضا زن قبرستان
کمہ موکل گلین منز تھآوکھ
چھیکھ لولچ سرحد نہنآومژ
اکھ خوف کرتھ چھم آر زوس
ولہ ویر چھ اندرے اتھ موران
تژپان تہ ترسان باکہ ژھٹان
نہ چھ باوکھ کانہہ نے بوزکھ کانہہ
بوڈ جیل بنیامژ موج کشیر
