ریاض ربانی کشمیری
شبابس منز سرابس منز خدا ژھارُن سٹھاہ مشکل
عمر گُزرِتھ پتو لاکن یہ دِل ہارُن سٹھاہ مشکل
قلندر چھنہ وُچھاں پَتھ برونہہ چھ نارس ووٹھ ژھناں یاشاہ
مگر نُوزک بدن نارس اٹَس تارُن سٹھاہ مشکل
بستھ آساں چھ متی کتھہِ منز سمندر علم و عرفانکی
کتابن ہندی ورق پھری پھری پزر گارن سٹھاہ مشکل
یتین ولویر تراواں پر تتِھس کُنہِ مرحلس واتِتھ
تتین بے وایہ پاٹھین عشقہ کرتلہِ سر پنُن دارُن سٹھاہ مشکل
ریاضا عشقہ دَریاوس وسُن ما گیہ جواں مردی
یہ دِل کترن تہ رژِھ رژِھ باگرُن یارن سٹھاہ مشکل
