سبَدر شبیر۔۔۔اوٹو اہربل
دل کین پردن أندرٕے سوز بوز
غافِل مو روز یارس نش
نَےستی لَیے تھاو یارٕ سُند پَے بوز
غافِل مو روز یارس نش
دلچے دارِ بر بندتھاوتھ منگ
عشقہ باغس چِھی بیے حد رنگ
رنگمتی چِھی وۄستہٕ کارس نش
غافِل مو روز یارس نش
دلس ییلہ عشقہٕ دۄد سننیے
پوز تہٕ اپُز اد ننیے
زبانی ٹھل گژھہ کرن خارس نش
غافِل مو روز یارس نش
اہنکارَس تتہ یتہِ کتہِ لگہِ تار
عشق گۄو ژالن مندنین گٹہ کار
دل سرخم کُرن دلدارس نش
غافِل مو روز یارس نش
اَسمان بسِتھ اَسمانس منز
یمے گیہ تَس یارس سند سنز
زوٗنہٕ ڈبہ چُھے شَہسوارس نش
غافِل مو روز یارس نش
شُنیاہ أندرے سر کر
نیہ تتِہ نہہ تے نیہ صحَر
پےَ بوزتمی سُند گاش دارس نش
غافِل مو روز یارس نش
دم گوو آدم دنیاہس آو
عشقہٕ سٔدرس چُھنہ ٹھہراو
کتھ ینہٕ باوَکھ اَغیارَس نش
غافِل مو روز یارس نش
من أندرے کَھنزِہ انی پانس قبر
آمہِ پَن ستی سٔدرس تارٕ تَر
کن مٔژٕرِتھ تھاوِ ناوِ تارَس نش
غافِل مو روز یارس نش
عشقہ سٔدرس منز سبَدر وَرزن واو
واوَس تہ نارس منز پکناو ناو
ہوش تھاو واوَس، نارس صَحراوس نش
غافِل مو روز یارس نش
