ڈاکٹر عزیز حاجنی بسیار پاسل تہ سِرساوی شخصیت 0

ڈاکٹر عزیز حاجنی بسیار پاسل تہ سِرساوی شخصیت

بشیر اطہر
7006259067

کہی تام کریوم کریوٹھ سفر زیوٹھ سفر طے
نزدیک وآتتھ دور سٹھا دور ژلُن پیوم

سامعین کرام یہ شعر چُھ وادی کشیرِ ہندس أکِس مشہور و معروف شاعر ،قلمکار،محقق تہ تنقید نگار ڈاکٹر عزیز حاجنی سُند یِیم کاشِر زبانی تہ ادبس اکھ نو انہار تہ اکھ پہچان دِژ.ڈاکٹر عزیز حاجنی آسی کمراز علاقہ کِس أکس ادبی گامس یؠتھ زن حاجن ونان چِھ روزان. پننہ نِس گامس ساتی بے انتہا مائے تہ محبت آسنہ کِنی کور یِمو پنہ نے گامُک تخلص اختیار تہ توے آسی حاجنی ناوہ سآتی پہچاننہ یوان.ڈاکٹرعزیز حاجنی چُھ کاشر ادبکہ تمہ لوبہ ونہ تہ شوبہ وُنہ پوشہ چمنُک سُہ خوش اندام گُل، یُس تا ابد پننی خوشبوئے ژھٹان اتھ گُلزارس شوب تہ شان بخشان روزِ…..ڈاکٹر حاجنی آسی اکھ معتبر تہ ذمہ دارمحقق، تنقید نگار تہ تخلیق کار آسنس ستی ستی اکھہ نثرنگار تہ ییم کاُشرس نثرس پننہ مقدورہ مطابق واریاہ کینہہ دُیت.تِم یوسہ تہ کام انجام آسی دوان تتھ منز اوس تِہُند خلوص، نیک نیتی، صاف گوئی تہ سنجیدگی نظر گژھان.تِمن ہندس لیکھنس منز اوس نہ کانہہ ہاو باو تہ نہ کانہہ خودغرضی نظر گژھان تمہ آس پانہ تہ لیکھان تہ باقین تہ لیکھنس کُن مآیِل کران تہ پنہ نین ہمکال نوجوان قلمکارن، شاعرن تہ ادیبن اَتھہ تُلتھ ہیچھناوان امہ ستی روٗد عام لُکن تہ ادیبن یِہند محبت تہ قربت ہُران. میتہ آس ڈاکٹر حاجنی یَس ستی زہ تریہہ ملاقات نصیبص مگر میہ باسیو زِ تِم آس گؤڈہ اکھ بہترین، رفیق تہ شفیق ساتھی تہ پتہ اکھ کُہنہ مشق ادیب تہ کیازِ تمہ آس گوڈہ اسہ ونہ ڈیکہ علیک سلیک کران تہ پتہ ادبس پیٹھ کتھ کران…. تِمن نِش نہ اوس کانہہ بوڈ تہ نہ کانہہ لوکُٹ ادیب بلکہ آس تمہ کینہہ لیکھناونس پٹھ مجبور کران تہ آس ونان زِ ییلہ ژہ گوڈہ خراب لیکھکھ تیلہ ہیککھ ژہ بہترین تہ لیکھتھ،اتھی چِھ ونان زبانی ساتی شفقت…… ڈاکٹر عزیز حاجنی آسی اکھ ریسورس پرسن Resource person تِہ… تہ توے آوسس نہ کانہہ ہیچھناونس منز گال باسان۔
ڈاکٹر عزیز حاجنی یَن چھے شعر و شاعری علاوہ درجن واد کتابہ تہ لیچھمژہ تہ کینژن کتابن چکھ کاشرہ زبانی منز ترجمہ کورمُت، یمن کتابن چھےکاشرس ادبس منز اکھ خاص حیثیت حاصل.یِمہ چِھ کاشرہ زبانی تہ ادبکی اکھ بہترین ژُکی در تہ ماننہ یوان۔۔۔۔ یمو یمہ کتابہ کاشرس ادبس چھے حوالہٕ چھے کرِمژہ تمو منز چھے پنژہن ورین ہُند کاشُر ادب پاری زان کاشُر نعت،کاشُر عقیدتی ادب، ہمکال کاشر شاعری اتھ انگریزی، ہندی تہ اردووَس منز ترجمہ چُھ سپُدمت، آنہ خانہ تھ انگریزی، ہندی، تامل، مراٹھی، پنجاب تہ کینیڈی زبانین
منز ترجمہ چُھ سپُدمت، تہ پتہ آیہ دریاوس زبان، مولوی صدیق اللہ حاجنی، میر غلام رسول نازکی، اسہ چھے پُرن ہمساین تل،تہ اردووس منز ویتستا کی سیر قابِل ذکر*
اَمہ علاوہ چُھ ڈاکٹر حاجنی ین واریاہن کتابن کاشر پاٹھی ترجمہ تہ کورمُت ڈاکٹر عبدالصمد سنزِ ناولہ دوگززمین نُک کاشر ترجمہ تہ ساہتیہ اکیڈمی ہندِ طرفہ دلت افسانن ہند کاشُر ترجمہ کرتھ بور یمو کاشرس ادبس لول 2015پیٹھہ 2018 ہَس تام چھے کلچرل اکیڈمی یِہندس ہدایتس تحت مختلف زبانن منز واریاہ تعدادس منز کتابہ تہ رسالہ شایع کرتھ مختلف زبانین ڈوکھ دُیتمُت،یہندس وقتس منز روز کلچرل اکیڈمی ژوداہمہ زُونہ ہندی پاٹھی نپہ نپہ کران تہ شعلہ ماران ……
ڈاکٹر عزیز حاجنی یَن چھے واریاہن عہدن پیٹھ کام کرتھ کاشر زبانی تہ ادبُک ڈیکہ لون پرزلوومُت تمو چھے گوڈہ حلقہ ادب حاجن تہ پتہ ادبی مرکز کمراز پنہ نِیو کوششو سئتی پوشہ باغکی پاٹھی شولہ ناوِمتی تہ ادبی مرکز کمرازس منز روزِتھ آپُر یمو کاشِر زبانی آنپہ تہ پھبناوٕکھ پننی زبان تہ پنُن ادب. تمہ چھ جموں و کشمیر کلچرل اکیڈمی ہندی سیکرٹری روزنس ساتی ساتی ڈپٹی ڈائریکٹر اکیڈمک بورڈ آف سکول ایجوکیشن، ریسرچ آفیسر سٹیٹ انسٹیچوٹ آف ایجوکیشن سرینگر، کاڈینیٹر شیخ العالم چیر، کنوینئر ناردرن ریجنل بورڈ ساہتیہ اکیڈمی نئی دلی، کنوینئر کشمیرایڈوائزری بورڈ ساہتیہ اکیڈمی تہ محکمہ تعلیمس منزکلچرل ایجوکیشن آفیسر تہ رودمت تہ۔ حکمہ تعلیمس منز بحثیت کلچرل آفیسر روزتھ کۄر یمو اتھ محکمس منز کلچرل ونگ ہُند ابتدا۔۔
یہ چھے اکھ ٹاکارہ حقیقت زِ کاشر نثر اوس ڈاکٹر عزیز حاجنی سُند گَہنہ. تِمو چھ نثر محققانہ اندازہ تحریر کورمُت یُس زن پرن والین خۄش چھُ کران یِمن پُر مغز تہ مُدلل مضمونن اندر چھے یمو کاشرس تہ کشیرِ ہندس تمدنس َکلچرس، زبانی تہ ادبس پرزنتھ تہ اہمیت دِتھ تھکنی لایق کام کرمژ، اگر اسی یمن ہندین اصناف سخنن واش کڑو تیلہ چُھ اَمہ خاطرہ بسیار وَق ضرورت۔۔۔ییتن چھے یہ کتھ تہ باون لائق زِ کُنہ زبانی منز ادؠکُھن گو کوہ قافس اَٹہ کرنی تہ کیازِ اتھ چُھ واریاہو مرحلو منزی گُزرُن پیوان خاص کر نقادن ہنزِ کہوچہ کھستھ پتہ تَمہ کہوچہ تَل نیرُن چُھ ؠٹھا مشکل آسان مگر ڈاکٹر عزیز حاجنی یَن کۄر نہ امُیک کانہہ تہ پرواہ تہ روٗد رایِل ہُیو کھڑا کاشرس ادبس ڈکِھہ…ڈاکٹر حاجنی سُند فکری باڈو چُھ واریاہ کُشادہ تہ وسیع تہ تِم چِھ کاشِرِ اسطورچ ثیقہ زان تھاونس ساتی ساتی نوین فکری روین تہ عصری روہرَکانن تہ عصری آشوبچ تِہ پوٗرہ آگہی تھاوان.یمن ہنز شاعری تِہ چھے میٹھ تہ مودر مگر سُہ چُھ رتہ سری رونہ زانس تہ منشہ موکھس تچُھن تُلان… کلامس منز چُھس جمالیاتی شعور تہ تجربہ نظر گژھان تہ چُھ مختلف سطحن پٹھ پننی مختلف رنگ تہ آکار تراوان.یوہے چُھ وجہ زِ یِمن آئے وقتہ وقتہ ینام تہ دنہ یتھ منز 2010 ہس منز ہرموکھ کاشر مرکزکہ طرفہ ہرموکھ ایوارڈ، 2013ہس منز ساہتیہ اکیڈمی ایوارڈ باپت بہترین کاشُر ترجمہ کار، 2013ہسے منز ہندی کشمیری سنگم نئی دہلی ہندِ طرفہ مہجور میموریل ایوارڈ، 2014ہَس منز دینا ناتھ نادم میموریل ایوارڈ تہ 2015ہس منز کتاب آنہ خانس ساہتیہ اکیڈمی ہندِ طرفہ بیسٹ بُک ایوارڈ دنہ آئے…
ڈاکٹر عزیز حاجنی آسی آکھ بسیار پاسُل، سِرساوی تہ ہمہ جہت شخصیت یِمہ شعروادبس ساتی ساتی صحافتس ساتی تہ وابستہ رُودی.. ٹیلی ویژن تہ ریڈیووَس سآتی تہ رود یمہ وایاہس کالس وابستہ یتہ یمو واریاہن پروگرامن نو زُو زیتہ دُیت.خاص کر دُیت یمو دورشن کِس شعبہ خبرس ساتی واریاہ وق.
اکھ تخلیق کار آسنہ خاطر چُھ اکس انسانس تخلیقی بِتُر آسُن واریاہ ضروری تہ کياز اکھ تخلیق کار چُھ لفظ شعوری تہ مُرادی معنیس یعنی Intentional Meaning منز ژاری ژاری ورتاوان.عزیز حاجنی صابس تہ اوس اکھ خاص تخلیقی تشخص بَدس یتھ پٔرتھ جمالیاتی ذوق ووتھہ بو چُھ لبان تہ قاری چُھ تمن لُطف تُلان.یہنزِ شاعری ہُند دامانہ تہ اوس رنگارنگ خیالو تہ جزباتو ستی مالامال۔ حساس طبیعتچ یہ چھجل بونی درایہ 12 ستمبر 2021 وَہس منز مُلہ تہ اتھ اندی پکھ شہجارس تل پھبن والی ادبکی پوش ہیتِن بَرہ گژھنی۔ ادبکین ژُخ درن چھے چھیکرس پیٹھ میانی اکے گزارش زِ تمہ کرن کاشر زبان تہ ادبس تتھے کنی پاراو یتھہ کنی ڈاکٹر عزیز حاجنی کران رودی ۔تہ اکھ أکی سنزِ مخالفت کرنہ نِش روزن لوب امہ ساتی ہکہ سانی زبان کاڈ تِہ کڑتھ تِہ باڈو تہ لبتھ ۔

اس خبر پر اپنی رائے کا اظہار کریں

اپنا تبصرہ بھیجیں