بشیر اطہر
سانی وادی کٔشِیر چھے قدرتی طور خوبصورت آسنس ستی ستی ادبی لحاظہ تہ واریاہ ذرخیز تہ چِھ پتھ کالہ پيٹھے بہلہ پایک ادیب، شاعر، قلمکار تہ تنقید نگار تھنہ پیمتی یمو سون کاشُر ادب پھانپھلاوتھ اسہ اکھ پہچان دِژیموے شاعرو منز چُھ اکھ پُرعظمت نوجوان شاعر نثار اعظم یمی کاشرِ زبانی لول برتھ پنُن آکھ شاعری مجموعہ”پتہ لجی زون درس” قارئینن تام واتنو۔ نثار اعظمس چُھ اتھ کتابہ پیٹھ ساہتیہ اکیڈمی ہندِ طرفہ “یُووا پُرسکار” دِنہ آمُت۔ نثار اعظم چھُ ییمہ پُیہ ہُند اکھ بہترین تہ باگہ بورُت شاعِر۔ نثار اعظم چھُ استعارن کام ہیتھ پننی شعر خوبصورت بناوان۔ یمہ چِھ ہَنا ریوایتہ ڈلتھ شعر ونان ییمہ کنی یمن ہندی شعر نیہ پُیہ ہندی نوجوان قاری چِھ پسند کران.نثار اعظم سنز کتاب پرتھ سپُد میہ یہ احساس زِ یمہ چِھ خبر کتھ دنیاہس سال کران تہ ونان زِ
پرتھ پدس ناگ پرتھ پڑاو گلاب
وتھ عجیبے یہ کاروانن وُچھ
بس بہ بنجاری قسمتن مورُس
کاتی گردش ییم آبہ دانن وُچھ
نثار اعظمن چِھ حمد بڑہ زَبر پاٹھی تخلیق کٔرمتی یِمن منز خدایہ سٔندی تعریف تہ چِھ نیہ آیہ کرنہ آمتی یہ تخلیقی بِتر وُچتھ چُھ انسانس رشک گژھان.ییلہ لیکھان چھ۔۔۔۔
وتھ ژہ ہاوان کاروانن چُھکھ
تم چِھ پروان مقام چانہ ستی
چُھس عبادت کراں فقط چانی
چون ادنیٰ غلام چانہ ستی
أمی سندس نعتیہ کلامس چُھ مانچھ پریڈان تہ یہ مانچھ کھیتھ چھُ انسان مدین کُن محوِ سفر سپدان تہ مدینکس لالس ونان زِ
شہنشاہ عالمن ہند یُس چُھ مالک حوض کوثر کٗے
سُہ حجرس منز بساں واللہ ییمس خاطر جہاں لوکو
مخالف یُد میہ چِھم ساری میہ مدتس چُھم رسول اللہ
سفینس بوٹھ لگُن میانِس مہ ٲسن بادباں لوکو
میہ زن تور فکرہ زِ نثار اعظم چھُ ریوایتی ادبس بغاوت کرتھ اکھ نو ادب بارسس اَنُن یژھان تہ باقین شاعرن أتھی وتہ پيٹھ پکناونچ کوشش کران. اتھ وتہ چُھ میچھر مگر چھے ٹھا کريٖٹھ۔أمی سُند انداز چُھ بیون تہ گفتارس چھے رونِہ وَزان تہ شرونی شرونی کرنس ستی انسانس مست کران۔خبر أمس ما چُھ ادبس منز اَکھ نو انقلاب برپا کرُن.تہ یُتھ انقلاب برپا کرُن گو کوہ قافس اَٹھہ کرٕنی۔اتھ انقلابس اندر بور دنہ خاطر چُھ نثار اعظم ونان زِ
یہ سوے سو ہیر چھے یوسہ کھسان عرشس کُن
دُبارٕ کتہ ژہ لبکھ پایہ پایہ راچھی کرُس
دِلُک صحیفہ دمے ورقہ ورقہ پرز مگر
میہ سومبرمُت چُھ لگے آیہ آیہ راچھی کرُس
نثار اعظم سٕنز شاعری چھے ہَنا کريٖٹھ ییمہ کِنی عام لُکن یہ فکرِ ترُن سیٹھہے مشکل چُھ تہ کياز یمن ہنزِ شاعری منز چھے استعارن،تشبیہن تہ محاورن کام ہینہ آمژ. یمو چھینہ عام لُکہ کتھہ تہ پَرہ ترایہ مژہ.نثار اعظم چُھ یتھہ کنی ونان زِ
دوہہ دگر واتہ لُکھ سحر ژھانڈن
روومُت کیا چُھ درسفر ژھانڈن
تن نپاں چھیکھ منس تُلیکھ کھے کُس
کیا کرن کُس کلایہ گر ژھانڈن
نثار اعظمن چھے نظمہ تِہ خوبصورت لیکِھتھ داد دِنس قابل بناوِمژہ۔یہُند نظمہ لیکھنُک انداز چُھ بیون تہ بِدون یمن ہنزہ نظمہ تہ چھے بزم ادب کس یاد ووترِس پھیور دِتھ تتھ تلاطم تُلان تہ کاشرِ زبانی تہ ادبچہ ویتھہ سہلاب ٲنتھہ قارئینن ہندس سوچس منز ہُریر کران.أتھی چِھ ونان کاشِر زبانی ہُند رأچھی در آسُن.
یادن ہندِ پتھ ونہ پیٹھ ووتھ
بُتھی پھیور اکھ یُپ خابن ہٗند
متہ پرژھتہ یُپس ستی کیا کیا ووتھ
احساس تہ ؤتھی جزبات تہ ؤتھی
نثار اعظم سنزونظمو ستی چُھ پزی کنی پرن والس اکھ احساس پادہ گژھان تہ جزباتن پُھیور لگان تہ یِمن جزباتن وُتش دِتھ چُھ پانس ستی گنگراوان زِ
زنہ تہ دری گنڈی ويٖروارو سانی کنی
بسم اللہ ستین ہیوتٗکھ ونہ وُن کرُن
زنہ وسُن آکاشہ مہرازس چُھ وٗنی
زنتہ پورتھ مہرنیاہ تھاوکھ زمین
نثار اعظم سنز کتابہ پتہ لٔجی زون درس اگر أسی پزی کِنی سام ہیموؠلہ چھے یہ اکھ شہکار کتاب اتھ پیٹھ تبصرہ یا تنقید لیکھنہ خاطر چُھس ٹھا وَخ درکار تہ ادہ کہ اتھ ستی انصاف سپدِتھ۔نثار اعظم سُند کلام چُھ بہارس نُو انہار دِوان تہ امی سندس کلامس چھے اکھ شُگفتگی پادہ سپدان ییمہ ستی ادبکس اتھ باغس پوشن بَنہ چھے سپدان۔نثار اعظم چُھ زندگی ہندین ٲوِلین پنہ داون کُھر کڈُن یژھان تہ پانس سختی تُلتھ تِمن سختی یَن زبان دُیُن یژھان.ؤں گو أمی سندس کلامس چُھ زاوِجار امے زاوِجار کِنی چھےأمی سنز غزلہ ،نظمہ یا نعت سیٹھہے شوبہ دار بنان تہ یہ شوب چھے دوٗرِ ٹھ نظرِ گژھان۔امی سندس کلامس چھے روانی برتھ آسان تہ أمِس چھے معنہ ساوِی لفظہ راش خدا صابن برونہے عطا کرمژ۔نثار اعظم چُھنہ ہنگہ منگہ اعظم بلکہ چُھ یہ پننہ علمہ، کردارہ تہ ورتاوہ ستی اعظم بنیومُت۔نثار اعظم سندس کلامس منز چھُ سُہ اکھ فلسفہ بٔرتھ یُس انسانس ناہموار وَتو کٔڑتھ ییمہ دنیا خاطرٕ لگہ ہار چُھ بناوان.اعظم سُند حوصلہ چھُ اسہ تہ حوصلہ بخشان.قارئینن پزہ نثار اعظم سٕنزن کتابن مطالعہ کرُن تہ ہَر تُلن تہ کياز امی سٕنز شاعری چھے پٔزی کنی اکھ وتہ ہاوُک۔ یتھین نوجوان شاعرن پزہ اسہ سلام پیش کرنی تہ کياز یمو ستی چھے سانی کاشرزبان تہ ادب لگہ ہار معلوم سپدان۔
