ژ یَیلہِ نہ آکھئے

ریاض ہاکباری
خیال اوسُم بہ ویُور تُلہٕ ہا گُلستانس ژء یَیلہِ نہ آکھئے
سیاہ اوبر اَز توَے چھ کھوتمُت ؤں آسمانس ژء یَیلہِ نہ آکھئے
بہ تشنہ لَب چُھس تِہ چون سریہہ چُھم نژان رگن منز دوہَس تہ راتس
نیصف راتس میہ دارِ بَر تھاوِ یَلَے مکانس ژء یَیلہِ نہ آکھئے
میہ اوس تھومُت یہِ پان پارِتھ چھ لول کوتاہ دِمَے تہِ ہاوِتھ
زُوول تہِ کورمُت میہ اوس سارسی محل خانس ژء یَیلہِ نہ آکھئے
تؤے بہ درامُت یہِ سٔترء کُون ہیتھ کتَن چھ یوسُف بہ مٔلی ہیمَن اَز
دپان لٔجی مٔژ چھ بولی بیہ عشقٔنِس دُکانس ژء یَیلہِ نہ آکھئے
خشوع تہِ اوسُم خضوع تہِ اوسُم چٔھلیتھ بہ اوسُس زبان آمُت
مُشِک تہِ اوسُم میہ لولہٕ تھومُت مٔلیتھ دہانس ژء یَیلہِ نہ آکھئے
یہِ چُھس بہ زأنِتھ سُہ میون دشمن ؤنی خبر کیا گٔژھی ژے نفرت
اِرادء اوسُم بہ دِیمہٕ تہِ ہاوِتھ ؤں کُل جہانس ژء یَیلہِ نہ آکھئے
کرییم ژھرَٹھ ژھرَٹھ اَنیم مَنویتھ یہِ پُووژ تراییم تِمن خورن تَل
اَمارء چانے میہ پھاسی پانَے دِژأے پانس ژء یَیلہِ نہ آکھئے
یہِ کٔمی کٔڈی کَل ژے یارء آخر دِژٔتھ نہ زانہہ اَکھ نظر تہِ یوکُن
ژء وارء وُچھ ہَکھ سُہ یار لوگمُت چھ کَتھ طوفانس ژء یَیلہِ نہ آکھئے
ژے اَز تہِ پراران ریاض اوسُی ژء سالہ یِکھنا بہ حال وَن ہَے
یُتے بہ وَن ہَے مٔژَر تہ ؤنہِ بَر ژء اَتھ خزانس ژء یَیلہِ نہ آکھئے