غزل
علی شیدا
کم خواب گاسہ ملئ چھ کناں سانہ گامہ لوٗکھ
روتُلئ گُہل چِڑاں تہ چیواں دامہ دامہ لوٗکھ
راتس چھ نندرِ خیمہ دِواں آبہ سرئ ذُوین
شاندس تلٕے تھواں چھ پنُن خواب نامہ لوٗکھ
آیکھ بدس نہ زوٗن پھولُکھ گرہنہ مت أچھن
پھیراں چھ کاٹھ بیار تُلِتھ بامہ بامہ لوُکھ
سونُے خلوص آو ژٹِتھ تاشواں سفر
سمکھاں تہ پانہ وأنئ کراں پامہ پامہ لوٗکھ
از کل نہ ژأنگئ گاش یواں راس گٔرئ گرن
ازکل وٹان أچھ تہ شونگاں شامہ شامہ لوٗکھ
ماتم کراں چھ کوت ژھوپن ہند عذاب سون
أنس أندرئ وچھان پننئ پرأنئ جامہ لوٗکھ
گلریز چھکھ نہ دارِ پیٹھے شاپھ از تُلان
شیدا یمے تہ آسئ پراں سام نامہ لوٗکھ
