غزل
آزاد گوہراننت ناگ
کوس تام شچھ ہیتھ ودناواں یارء بلن شام
زن چاک کراں سینہ ژٹان آرہ پلن شام
بیدار اچھن، راژء شبن ما چھی فراغت
یتھ ییلہ چھ فران گرم شہن نندری زلن شام
جذبات دفن،زیو چھ کلن،غم چھ ستاوان
ژوپاری چھ بس پوشہ گّلن تاوی تلن شام
گگرائے کرتھ ڈونٹھ ڈویت پھلیئ کران سور
مندنین کرتھ وزمل چھ گژھان گامہ کولن شام
پھسرائے وٹھن پیٹھ تہ چھ خاموش مزازس
ہر رنگ کران داغ دیتھ معصوم دلن شام
آزار غمک جامہ ولین تیلہ چھ پیوان بیہ
یلہ یلہ چھ چھکن کرور تلتھ زہر ملن شام
