سبَدر شبیر۔۔۔۔اوٹو اہربل
جُدا سپدس عالمِ نیستانے
وَنَے کیاہ عَشقو کنرک داستانَے
سُہ ماشۄق چُھم مَستانے
وَنَے کیاہ عَشقو کُنرک داستانَے
ینہٕ گوم دوٗریؠر تنَے چُھس نالان
چُھ خالِق پرتھ شایہ ہیتھ پیمان
میہ فراق أندری چُھس پشیمانے
وَنَے کیاہ عَشقو کُنرک داستانَے
ناسُوت أندرے کورنس بوٗد
مَرِ یُس زندے تَس کیاہ موٗد
نہ چُھ تتہ نفاء تےنہ چُھ نقصانے
وَنَے کیاہ عَشقو کُنرک داستانَے
کٔرن پادٕ زمین بییہ اَسمان
بساون کایٔنات بییہ انسان
ملکوٗت جبروٗت نوٗرِ نوٗرانے
وَنَے کیاہ عَشقو کُنرک داستانَے
وجوٗدس اندر موجود چُھے
سجودس اندر سر کرن چُھے
شین طرفن چُھے ایانَے
وَنَے کیاہ عَشقو کُنرک داستانَے
گٹہِ منز گاہ پیو کلِ کایناتس
تس ٲآسی ملون ستیٕۍ ذاتس
جامہ پارتھ نون دراو عربستانے
وَنَے کیاہ عَشقو کُنرک داستانَے
شرقس غربس طرفس طرفس
الست بربکم وونے روحس
قالو بلا سبَدر گوو دیوانے
ونے کیاہ عَشقو کُنرک داستانَے
