بلال صہباؔ
عجب اثرات اس خنجر میں دیکھے
شگوفے کھل اٹھے بنجر میں دیکھے
“نہیں” کچھ راز بھی رکھتا ہے خود میں
“سوا” کی آنکھ سے مَندَر میں دیکھے
کبھی جو دید کی حسرت میں رویا
بدلتے اشک بھی گوہر میں دیکھے
خرد کو بام پر رکھ کر یقیناً
کھلے گل عشق سے اخگر میں دیکھے
چھپا ہے وہ حجابوں میں اگر چہ
عیاں جلوے یہاں پیکر میں دیکھے
نظر وہ سب جبیں میں آگئے ہیں
مَلک نے جو نشاں اختر میں دیکھے
محبت کے سفر میں ہم سے صہبا
ہزاروں رہنما ششدر میں دیکھے
