غلام محمد دوانی دلشادؔ
کھریو پانپور۔9906500844
نو بہار آو در شبِ معراج
کوسمن چھِ کراو در شبِ معراج
دینِ اسلامُک باغِ نشاط
وُچھ پھلِتھ آو درشب معراج
حق تعالیٰ شاہ لولاکسؐ
بر کرم آو در شبِ معراج
ماہِ رجبن ستووُہم تاریخ
بارسس آو در شبِ معراج
آنحضورَس جبرئیل امین
ہیتھ خبر آو در شبِ معرج
میزبانی چانی کرِ از رب
کرِو پیراو در شب معراج
فلک پُر نور گْیے ملک مسروٗر
لوگ تُلہم تراو در شبِ معراج
تاجدارن کور قبول بور کوٗت
براقن چاو در شبِ معراج
کمہ حشمتہإ وُچھِ یہ سون محبوب
سیرس دراو در شبِ معراج
مرسلن انبیا ہن در اقصیٰ
پیشوا آو در شبِ معراج
از اقصیٰ تا اَو ادنیٰ
بر ہوا دراو در شبِ معراج
حورہ تَے غلمان ونہ وان ونان
تاجدار آو در شبِ معراج
حض خلیل، موسیٰ تہ عیسیٰ کران
مرحبا آو در شبِ معراج
جنتہ کین اعلیٰ مقامن اندر
کورُن ٹھہراو در شبِ معراج
دوزخُک نار ڈیٰشتھ نبیؐ پاک
اَشک بار دراو در شبِ معراج
آسمانو زمینو نیبر گوو
پوشُس نہ واو در شبِ معراج
تمہِ تور جبریل عاجز گوو
لامکان ژاو در شبِ معراج
ذات پاکن دوپُس ژہ یم نزدیک
سپد معراج در شبِ معراج
ظاہر تہ باطن نبیؐ پاکسؐ
باونہ آو در شبِ معراج
یی نہ کانسہِ نبین تہ مُرسلن ہیوکھ
تی وُچھِتھ آو در شبِ معراج
ذاتن دوپنس اے محبوب
حالِ دِل باو در شبِ معراج
مغفرت کرُم اُمتس یارب
مِنتھا تھاو در شبِ معراج
چھُس راضی تس یس ژإہ چھُکۃ راضی
اُمتس باو در شبِ معراج
پانژاہن نمازن مونگن تخفیف
پانژھ ہیتھ آو در شبِ معراج
حمد تے ثنا پران ذاتس
شانہإ بوڈ آو در شبِ معراج
یوہے اوس شب اَمچ آخری گْر
ژہ ژیتس تھاو در شبِ معراج
نْنی گواہی دِتھ یار غارس
پیوو صدیق ناو در شبِ معراج
دم غنیمت زان اے عاشق
چشمہ ووتھراو در شبِ معراج
در محبت ژہ کر فد زُو جان
سر پتھر تراو در شبِ معراج
کاش روزوم بر زبان ہر دم
ماری موند ناو در شبِ معراج
یا رسولؐ سالہ یِتھ سانہِ لولکی
یِم چمن چھاو در شبِ معراج
بو وندے جان اَتھ جانِ پاکس
تنہِ مُژراو در شبِ معراج
یارسولؐ نوٗر ستی سآنی دِل
از گاشراو در شبِ معراج
اُمتی بیتاب چھِ عرضی کران
اَسہِ رُخ ہاو در شبِ معراج
بوز سانی نِدا یا رسول از
پردہ تھود تھاو در شبِ معراج
چشمہ ما زاغ از تُلِو اَسہِ کُن
اکھ نظر تراو در شبِ معراج
از تمنا دِلکٰ کڈو یکبار
ژلہِ آمہ تاو در شبِ معراج
آنہ اَکے سانی دْدمتی بدن
پانہ شہلاو در شبِ معراج
گِردابس منز گومُت چھُس گیٗر
بوٹھ مے لاگ ناو در شبِ معراج
چھُم خطا مے سیٹھاہ گامتی از تام
تِم ژہ مشراو در شبِ معراج
کرُن آزاد یا رسولؐ دِلشادؔ
غمزدہ آو در شبِ معراج
