کلام:سبَدر شبیر۔۔اوٹو اہربل
فکرِ ستی ذکر کر پون دِہ زمینس
گُل پھۄلہِ چانس سیٖنس منز
مُیُل گژھہِ پانَے گاش ییہِ نا بیٖنس
گُل پھۄلہِ چانس سیٖنس منز
دل ستی یُس کر اِستکبار
تس کیاہ کر دوزخُن نار
سوزِ یُس درود نبی نازنیٖنس
گُل پھۄلہِ چانس سیٖنس منز
دِل ستی یُس منگہ ربَس دعا
تٔمس چِھی روزان مَلک گواہ
نظرہ کرِ رب چانس یقیٖنس
گُل پھۄلہِ چانس سیٖنس منز
دم ستی یُس کر ذکرِ حق
ؤسی پییہ پانَے أندرم شَکھ
حق ستی زان کر حق الیقیٖنس
گُل پھۄلہِ چانس سیٖنس منز
دِلس بییہ زبانی کر پانہ یکسان
وُچکھ دیٖدن یارِ جانان
لگہِ کاْلی پُرسان تتہ بےدیٖنس
گُل پھۄلہِ چانس سیٖنس منز
با علم یُس آسہِ سُے گوو گاشدار
بے علم، با علم عملہِ رۄس جاناوار
علمہ ستی زان کر علم الیقیٖنس
گُل پھۄلہِ چانس سیٖنس منز
بے پژھ اِنسانس چَھیہ وَتھ رَاون
أنس چُھے عشقہٕ رۄس مُش ہاوان
پَژھ ستیٕ زان کر عین الیقیٖنس
گُل پھۄلہِ چانس سیٖنس منز
سبَدر جگرٕچ زیوِ کر تُل تراو
ذکرِ حق ستیٕ من أندرم رنزناو
ژھایے ژلہِ چانس دِل ٲیٖنَس
گُل پھۄلہِ چانس سیٖنس منز
