پریم ناتھ شاد
مُصطےٰ عالی مقامس نور یزدانس سلام
نازنینس دِل نشینس جانہ جانانس سلام
محسن انسانیت یُس چارہ گر لا چارنے
بے مثل عزتھ مابس عـظمتس شانس سلام
دُر فِشاں رحمتھ پناہ شیرین کلام خیر البشر
گاشہ آگُر شمع محفِل رویہ تابانس سلام
یُس امام انبیا معشوق خُتم المرسلین
رحمتہً لِلعالمینس محبوب سُبحانس سلام
شادؔ باوتھ چانی چھُے چانین خیالن ترجمان
قہر منز موکجار یُس دیہ تس مہربانس سلام
