سبدر شبیر
اوٹو اہربل کولگام
sabdershabir7777@gmail.com
أکس زمانس اوس اکھ عارف ، شیخ نعمان، پہاڑن منز باگ أکس لوکٹس گامس منز روزان ـ نہ اوس سُہ کانہہ پیر تہٕ نہ کانہہ درویش مگر لوکھ ٲسس محبت سان پیش یوان تہٕ لوکھ ٲسی أمس ونان “ہدایتُک ژونگ” ـ أمی سنزن أچھن منز اوس نور تہٕ کتھن منز تثیر آسنہ ستٕی اوس أمس برونٹھ کٔنی دل نرم گژھان ـ نہ اوس سُہ کتھن پیٹھ زور دوان نہ اوس واعظ پران ، بس سوال اوس پریژھان تہٕ پتہ اوس ژھوپہِ کران ـ۔
سُے سوال اوس بوزن والی سنز زندگی بدلاون ـ
اکہِ دۄہ آو اکھ نوجوان ،یُس زن شہرس منز دنیاوی تعلیم حاصل کرنہٕ پتہ اوس گام واپس آمت ، اکہ دۄہ آو یہِ شیخ نعمانس نش ـ أمی سُند ناو اوس سالم صاب۔
یوان یوان پریژھ سالم صابن أمس سوال:
“حضرت میہ ونتو خدایہ کتھ پاٹھ ییہ اتھ میہ چھنہ نظرے گژھان-”
شیخ صأبن تراو اَسن
” بہہ سا گوبرا تھاو قدم ولہ بہٕ بوزناوتھ کینہہ ـ…….. اکھ حکایت -”
حکایت : ترے أنی اکھ ژونگ
اکھ وق اوس ، أکس انہ گٹی شہرس منز أسی ترے أنی بزرگ روزان ـ یمن ہند ناو اوس عقل، خواہش تہٕ غرور ـ تریشونی اوس گمان زِ أسی چھ پزر زانان، پریتھ اکھا چُھ اکھ أکی سند نش طاقت وار ـ اکہِ دوہ پھہلیے شہرس منز خبر زِ أکس بستی اند کُن چُھکھ اکھ ژونگ تھومُت ـ یُس زن ھدایتک گاش چُھ دوان ـ مگر شرط اوس یہِ زِ یُس تہِ اتھ ژونگس نش واتہ ،تمس چُھ پنیو أندرمیو أچھ ستی وچھن، نتہ ییہ نہٕ ژونگ اتھ کینہہ تہِ ـ
عقلہِ وون :” بہ چھس سورُے زانان ،میانس علمس نش چھنہٕ یہِ گاش کینہی تہِ -”
خواہشہِ وون :” اگر یہِ ژونگ میانین خوشین منز ہیکہ ہورؠیر کرِتھ، تیلہ انن بہٕ یہِ پانس ستی غرور ہلرو کلہٕ : ” بہٕ چُھسنہٕ ژانگیک محتاج کینہہ تہِ ، تمِس پز بہٕ ژھانڈون ـ” ؤنی درایہ تریشوے ـ وتہِ تھوو عقلہِ سوالن ہند زال وہرتھ :
“یہ ژونگ کُس سا چُھ ؟ کٔمی وون؟ کتہِ آو……. ؟
تٔمی سندین سوالن منز لوگ ہورہیر گژھنہ تہٕ سُہ گیہ محو یمنے سوالن منز تہ بیٹھ أکس کُلس تل تہٕ تراون تتھے آرام تہٕ ژانگس نش ہیچ نہٕ واتتھ کینہہ ـ خواہشہ گیہ، وتہِ منز گندؤنس بازرس منز جایہ جایہ روکتھ ـ کنہ شایہ ہیوتن خۄشبو مٔلی، کنہ شایہ ہیوتن پوشاک، کنہ شایہ لاگنی باتھ بوزٕنی ، پریتھ کانہہ مستی کٕرنی ـ تمس روٗدنہ یادے زِ بہٕ میہ چُھ ژانگس نش گژھن ـ شام گژھتھ تھکیتھ آیہ خالی اتھ ہیتھ واپس ـ
غرور …. گوبرا غرور ونتھے گوو اند ہیتھ انہکار ـ وتہ منز یُس تہِ میلان اوسس تمس اوس خشمہٕ ہوت وچھان ، ییلہ ژونگس نکھہٕ ووت، تہٕ تتہ اوس اکھ سیود ساد مُنش وۄدنہِ روزتھ ،تمی وونس “اگرے ژے ژونگ چُھے وچھن ، تیلہ پز ژے عاجزی اختیار کرنی ـ”غرورن تراو زورٕ سان اَسن ہا ہا ہا…… تہٕ وونس :
بہ کیاز نمراو کلہ کانسہ برونٹھ کٔنی ؟ ژونگس اگرے طاقت چُھ پانے یینی میہ نِش !”
تہٕ سہ دراو خالی اتھو واپس
کینہہ کال گژھتھ ، آو اکھ غریب ،اون مرد، یم سنُد ناو دل چُھ، اتھ ژونگس متعلق بوزان، سُہ چھُ سادگی سان پریژھان:
“اگر بہ اون چُھس، کیاہ تیلہ تہِ واتا بہٕ ژانگس نش”
کٔمی تام دیتنس جواب :
“آ بالکل….. اگر اے دل ژ پزرک طلبگار چُھکھ”
سُہ مرد دراو لوٗر ہیتھ ـ وتہ ہنز چمک، بازرچ آوازٕ، تہٕ وتہِ ہنز سختی ہیوک نہٕ روکیتھ کینہہ تہِ ـ أمی پریوژھ پریتھ سمکھن والس پے پتہ ، تمن ہند کورن شکر ادا، جوکیتھ رود تہ ہیچھان رود ـ
ییلہ ژونگس نکھٕ ووت تہٕ اکھ آواز آیہ :
” أے دل ! ژے چھے نہٕ پنہِ أچھ ستٕی وچھن کیہنہ تہِ ،بلکہ پنہِ باطن ستٕی چُھے وچھن ـ کیاہ ژٕ چُھکھا تیار امہ خاطر ؟”
دل وتھ تہٕ وونس
“بہ چھس نہٕ کیہنی زانان، نہ چھس بہٕ اہلِ دل مگر طالب چُھس، ژونگ گوژھم…… گاش گوژھم ـ”
تہ اتھی ستٕی گیہ اتھ دلس منز نوٗر وزمل داخل، سُہ لوگ وچھنہِ ـ ژونگ گوو اتھ دلس منز تہٕ یہ لوگ گاہ تراونہ ـ شیخ صابن کٔری ژھوپہ ـ سالم صاب رود سونچان ـ
کینہہ کال گژھتھ سالم صأبن پریژھ :
کیاہ مطلب أمی حکایژ ہند
شیخ صابن وونس….
“ژٕ چھکھ عقل ، ژے چھیہ باسان زِ داستان ونہٕ ستٕی واتو خدایس نکھٕ ـ کینہہ لوکھ چھ خواہشو ستٕی دینس ژۄچہ کران ،تہٕ کینہہ چھ غرورس تہٕ گمنڈس منز ہینہٕ آسان آمتی ـ مگر یم دل پوز چِھ ونان، تمن چھ خوایہ سنز رضامندی حاصل گژھان-”
سالم صابن وونس وار وارٕ
“تیلہ کیاہ علم چھا بیکارٕ؟ ”
شیخ صابس آو وٹھ اَسن:
“علم چُھ گاش، اگر نہٕ سُہ دلکس درواز پیٹھ اندر اژِ تیلہ چُھ یہ وۄلہٕ بۄر بنان ـ ہدایتہ خاطرٕ چھ ترے چیز ضروری: صدقِ دل آسن، عاجزی، انکساری تہٕ طلب باقے چُھ پتہٕ تأبع روزان ـ”
سالم صابن ییلہ واپس ہیوت گژھن، تہٕ شیخ صابن دیت أمس اکھ شیٖشہِ تہٕ وونس :
“ییلہ ژٕ زانہہ کألی شک گژھ ، یتھ شیشس منز ؤچھ زِ ، تہٕ پنس پانس ؤنی زِ : کیاہ بہٕ چھسا اَمہ ژانگیک طلبگار؟ تکیاز ہدایت چھنہٕ نیبر یوان بلکہ دلس اندر چُھ نور پھولان”
سالم صابن تراو ژھوپہ کٔرتھ وٹھ اَسن تہٕ شیشہِ تُلن ستٕی ـ وٕنی اوسنہ سُہ ھدایتس ژھانڈان کینہہ تہِ بلکہ ھدایتھ اوس تہندس دلس منز چمکان.
حکایژ ہند پاغام
یہ حکایت چھنہٕ محض ترین گاشہِ روس انسانن ہنز کہنی، بلکہ انسان سنز باطنی حالتچ عکاسی کران:
عقل اگر غرورس،گمنڈ تہٕ تکبرس منز ولنہٕ آسہِ آمژٕ تیلہِ چِھ یہِ دلیلن ہندس گردِ آبس منز ڈوبتھ گژھان ـ
خواشہِ اگر لاکمہِ وارے آسن، تیلہِ چھ وتھ روان ـ
غرور چُھ عاجزی، انکساری تہٕ نرمی ہند شَتُر تہٕ بندٕ چُھ روزان ھدایتہٕ نش دوٗر ـدل اگر مخلص آسہِ اون ٲستھ تہِ چھُ ھدایتچ وتھ حأصل کران ـھدایت چھنہٕ علمہٕ ستٕی میلان ، بلکہ طلب ،توبہٕ ، عاجزی تہٕ پزر ستٕی میلان ـ۔۔۔
����
