علی شیداؔ
نجدہ ون
منہ کس بانس گریکھ لج یامتھ ناصرؔ بوز
مرِ منز تامتھ ہکہ ژلئ کلئ کوتر کاتیاہ
یہ شعر چھ تتھس أکس گونماتہ سنز ژینہ ون دوان یس شاعری رمس رمس منز بستھ چھے۔ تہ پتہ ییلہ یہ شاعر کاشرِ زبانئ ہندس أکس بہلہ پایہ ادیب مرحوم ناظر کولگامئ سند اولاد آسہ تیلہ چھنہ سرتلہ سون بننس تأر لگان۔
بہ زانن ناصر منور لوکچارہ پیٹھ ۔ اکھ چھ یم اسہ ہمسایہ تہ دویم زہ ناصر اوس مے کامہ بوج تہ۔ مگر وقتکین ژھلن کیا کرو ناصرس پیو زندگی ہند کریچھر زیادے پاہم یمکہ وجہ تسند شاعرانہ سفر متاثر سپد۔ مگر کینہ کال ہیتھ ہیوت یمو اتھ فنس دوبارہ لول برن تہ تمیک نتیجہ چھ از کتابی صورتس منز تہنز، “سیاہ شبن منز” ناوئ شعرہ سونبرنہ رنگئ پرن والین برونہہ کن۔
ناصر سند اسلوب تہ طرز فکر چھ ناظر صابس سیتئ رلان مگر اتھ منز چھنہ ناصر سنز پننئ شناخت گم گژھان بلکہ چھ ناصر پنن الگ آسن نمایاں کرنس منز کامیاب درینٹھی گژھان ۔
نوین موضوعن نوہِ اندازہ لفظن ہند پاراو کرنس منز چھ ناصر منور سند انہار تہ اظہار ٹاکارہ۔ نأصرس چھنہ لفظن ہنز کمی روٹہ کران تہ نہ چھ تس موضوعن ہند قحط تنگ دامانی پشران ۔اہندس کلامس منز چھ رومانیت سرس، وصل تہ ہجر گتہ گیور کران، گراوہ تہ شکوہ تلاطم تلان ۔ زمانکئ ویہہ چھور چھور کران۔۔۔۔۔
دپہرئ تاپھ زالاں چھ سینک شہل
چھ منز رودہ شرانین دزاں میانئ شعر
مے وون گوڈے زہ ناصر رود واریاہس کالس خاموش تہ ادہ ییلہ سہ امہ دورہ منز دراو تسند شعرہ ناگ آو بر بکہ تہ تمئ رٹئ وزونہ ناگرادچ لے، مگر اتھ لیہ منز چھ نارہ ژھٹہ گتئ کران۔۔۔۔۔۔
شعر تتھ کنئ پیواں چھ تھنہ از کل
نار بوزیو شریپاں چھ منز ورقن
ناصر ییتہ تازہ کالوکچار ہند قایل چھ تتہ چھنہ سہ روایتی شعرہ مزاز اتھ منز تراوان۔ ترکیب سازی چھ أمئ سند کار شوق تہ مختلف بحرن منز تجربہ کرنک ژھل ول تہ چھس بدس۔لفظن سیتئ گند گند کرن چھس خوش کران۔۔۔۔۔
اچھر چھ زخمی لفظ چھ ہے بنگ
ژھوپے چھ لل کھول کرن غنیمت
ناصرن شعرہ ول تہ ورتاو چھ بعضے حیرتس منز تراوان ۔ سادہ لفظن منز زندگی ہند دوکھ بے شونکئ پاٹھئ کاغذ ورقس پیٹھ وہراون چھ أکس سنجیدہ قلمکار سند نیب دوان ۔۔۔
سریہ تامتھ چھ زن وں ہندریومت
اوش پھیریو نار وُش کراں اوسس
ناصر چھنہ پننہ سماجہ نشہ بے خبر۔ ییتہ یہ پننین سوکھن دوکھن شعرن ہند موضوع بناوان چھ تتہ چھ أمس پنن اوند پوکھ تہ أمچ اجتماعی دگ تہ تچھن تلان ۔ یہ چھ أکس ذی شعور قلمکار سند وتیرہ ۔ستمن تہ غمن ہند زہرِ ہلال چیئ چیئ کیوتھ چھ سون مزاز بنیومت، ناصر چھ تمچ باوتھ تہ کران۔۔۔۔۔
لاشہ انبر ڈیشتھ حض اسہ چھنہ لرزاں روح
أسئ چھ ییمے پروارہ ہنزے اکھ نٔو پُتنے
ناصرس چھنہ موضوعن ہنز کمی سہ چھ لفظن تھپھ دتھ تیوتھ شعر گران زہ پرن وألس چھ سوچہ سدرس لہرہ ووتھاں ۔یہ چھ ہاوتھ دوان زہ ناصر چھ نوہ فکرِ ہند شاعر تہ تس چھ زندگی ہند وسیع تجربہ بدست۔۔۔
لولہ شہل کرہا اکھ ساعت
تاپہ تیونگل موژرووم پان
معشوقس گراو کرنکئ چھ کاشر شاعری منز لاتعداد اظہار مگر ناصر چھ اتہ تہ پنن بدون انداز ورتاوان یس خوش کرون تہ چھ تہ شعرہ مزازس ویہ ون تہ چھ۔یمے شاعرانہ ژھل تہ باوژ بل چھ أکس گونمات سند مقام طے کران۔۔۔۔۔۔۔۔
گٔلتن ارمانن ہند پونپر
پژھِ ہند ژونگ بہ زألتھ تھاوس
گلن ہندئ مے تھأمتئ چھ افسانہ لیکھئ لیکھئ
کنڈین ہندئ زخم ونتہ چھی کیتئ ہاونئ
ناصر چھ بعضے رومانی پوشاک نالہ کڈتھ مژرکئ جامہ تہ ولان ۔ یہ چھ تہندہ فکری ظونک أنہ یتھ منز حیرتکئ برأنتئ روو چھ کران روزان۔
تیونگل تتئ لدئ مے ہلمس رأتئ راتس
متین ہندِ یاربلہ دامن چھلتھ آس
ناصر ییتہ ژھوچین بحرن منز خوبصورت شعر ونان چھ تتہ چھ سہ زیچھن بحرن منز تہ رتئ پاٹھئ تخلیقی ول ورتاوان۔ طرحی مصرعن پیٹھ طبع آزمائی کرن تہ چھ تس راس آمت تہ غزلہ منز وارا شعر لیکھنک بتُر تہ چھ تس بدس۔ سہ چھ نوئ نوئ تجربہ کرتھ یہ باس دنچ کوشش کران زہ تس چھ شاعری ہندئ ساری رنگ اونگجن ولتھ تہ یمن تجربن چھ کامیابی ہنز مہر ٹاکارہ اتھ یوان۔ناصرن چھ أکس غزلہ منز پریتھ شعرک صدر تہ ابتدا حصہ ہم قافیہ بنومت یس اکھ بدون مگر خوبصورت تجربہ چھ۔
ناصر چھ سیٹھاہ زود گو شاعر۔ یہ زود گوئی تہ چھ تس مالئ وراثت۔ وں گو اتھ زود گوئی منز تہ چھنہ ناصرنئ شاعری کنہ جایہ سطحی آسنک باس دوان یوسہ بڈ کتھ چھے۔
ناصر چھ ہمکال شاعری ہند پریول ون گونمات تہ پر امکان غزل گو یمس تھود پرواز کرنک وپھوار چھ۔یژھ فکری وسعر چھے کمنے گونماتن باگہ یوان۔
مے چھ پورہ امید زہ نأصر منور سنز یہ شعرہ سونبرن پرن شوقہ وألئ شوقہ سان تہ تلن یمن معنہ سأوئ کلامن حظ۔
����
(علی شیؔدا نجدہ ون )
alishaida@yahoo.com
