ٹرباز خان

بہ چھُس اکثر سوچان زِہ بہ کیازِہ چُھس سوچان۔ تکیازہ کانہہ کتھ سوچنہ برونہہ چھ ضروری یہ سوچُن زہ بہ کیازہ سوچہ سو کانہہ کتھ ۔ مے پزیا یہ کتھ سوچنئ کنہ نہ۔
سوچن چھُ ابنِ آدمس بارِ۔ تیلی چھ سُہ اشرف المخلوقات ۔ تہ یہوے چھُ تس بوڈ شرف تہ یہوے سوچن چھ تس خوبصورت تخلیق آسنک درجہ عطا کران۔
سوچس تہ چھ مختلف پڑاو تہ مختلف منزل۔ سوچنہ باپتھ چھ دل تہ دماغ زہ اہم کارخانہ۔ دل چھ احساسن پیٹھ پننئ عمل کران۔ یتہ ہیکو ونتھ زہ اتھ چھ الہام ڈکھِ مگر یہ چھ فقط یینئ وونان تہ سوزان دماغس۔ دماغ چھ اتھ تمی انمانہ پیٹہ بخشان تہ تیار کران یوتا سوچس وسعت آسہ۔ سوچ چھُ مختلف تجربہ تہ کران تہ مختلف تجربو منزئ گزران تہ۔ سوچس چھ پنن وقت تہ اکہ نتہ بییہ رنگئ مدد کران۔ وقتس چھ پننئ مصروفیات تہ پنن گردش۔ یم ساری تماشہ چھ سوچس پیٹھ اثر انداز سپدان روزان۔ سوچ چھ یمنے مختلف امرن تحت پننئ ژھل بل کران۔
انسانس چھ سوچی ہیچھناوان۔ زہ کتھ پأٹھئ گژھِ سوچُن۔ کیازہ تہ کمہ باپتھ گژھ سوچن۔ کائناتک نظام چھ لگاتار پننس گردشس منز پننئ کأم کران۔ یہ چھ أکس قدرتی نظامس تحت۔ انسان چھ اتھئ گردشس منز أمی گردش چہ تلہ ترایہ سوچان تہ بعضے تہ سوچان ینہ سوچنچ ضرورتھے چھے۔ تکیازہ فطری نظام چھ خودکار تہ زیرِ امرِ حق۔ انسان ہیکہ صرف تمن چیزن متعلق سوچتھ یمن پیٹھ تمس اختیار چھ تہ باقیس پیٹھ ہیکہ صرف قیاس آرائی کرتھ۔
سوچنچہ اتھ عملہ منز چھ اکھ انسان تمن چیزن تہ کامہ لاگان یم سہ وچھان بوزان تہ محسوس کران چھ۔ یمے ترے چیز چھ تمئ سندس سوچہ سدرس برژر کران تہ گرایہ دوان روزان۔ انسان یوتا زیادہ کائنات کین رازن سنہ تیوتا چھ تسندس سوچس وسعت میلان تہ سہ چھ زیادہ زیادہ سوچان۔
اگر اتھ سوچس پیٹھ سوچ کرو تیلہ ننہ اسہ وارا کیہنہ۔ ساسہ بدیو طبعی ِ سائسنی تہ کتابی فلاسفرو چھ اتھ سوچس پیٹھ سوچمت تہ بجہ بجہ کتابہ لیچھمژ تہ روزگار تہ ناو کمومُت۔تہ ازتہ چھ یہ سوچہ کار طیس پیٹھ چلان۔ کولسنِک سُند سوچ چھُ۔۔۔
Thinking is the reorganisation of concept.
تہ ورڑسورتھ چھ یتھ پأٹھئ سوچان۔۔۔
Thinking is the mental exploration for finding out the solution to a problem.
یتھے پأٹھئ چھ گیریٹ تہ سوچتھ ونان۔۔۔۔
“Thinking is a behavior which is often implicit and hidden and in which symbols (images, ideas, and concepts) are ordinarily employed.۔
Ross, Jung یا Paul
تہ چھے اتھ سوچس متعلق پننئ سوچن تراے پننہ انمانہ باوان۔
یتھئ چھ ساسہ بدی پیپر لیکھنہ آمتئ۔یم سائکالوجی ہندس اتھ Metacognition کس دأئرس منز یوان چھ۔ اتھ سوچس منز چھ دنیا کیو کمو کمو ولہ ویرو مغز ماری کرتھ پننئ ماڈل دنیا ہس برونہہ کنہ ترأمتئ۔ یم object level تہ meta level کین معاملن واش کڈان چھ ۔ اوبجکٹ لیولہ پیٹھ چھ سوچ یوان تہ میٹا لیول چھ سوچس متعلق سوچان۔
سوچان سوچان ووتس بتہ خبر کتھ سوچس۔
لوکھ چھ سوچان تہ سوچن چھ کامہ کارس منز گردش کران۔ تہ یہ سوچہ کار روزِ توتام جاری یوتام یہ کائنات پانس متعلق سوچان روزِ۔
بعضے چھ یتہ گژھان زہ سوچنچ یہ عمل چھ حدہ نیبر نیران تہ انسان چھ پننہ اصل سوچہ نش تہ اتھ چھلان۔
سوچن گژھ تیوتُے یوتا دماغس ژالنُک جُست آسہ۔ تیوتُے گژھِ سوچُن یوتا ضرورت آسہ۔تہ تیلی گژھِ سوچن یلہ ضرورت آسہ. اگر سوچن آسہ تیلہ گژھِ رُت سوچُن تکیازہ مثبت سوچ چھُ مثبت شخصیت تعمیر کران تہ صحتمند سماج بارسس انان۔نتہ گژھ سوے باش یوس سانین واریاہن شأعرن تہ نثر نگارن گأمژ چھے یم بلا سوچے سمجھے کلامِ ہاہاہاہا لیکھان چھ تہ جوابِ واہ واہ حأصل کران چھ۔ غزلن نہ راد آسان تہ نہ ہونز۔ نظمہ دچھ رأٹھ ہش تہ افسانہ چھ اخبارئ خبرن ہندئ ژٹہ واٹھ آسان۔
تہ یتھِی سوچہ سیتئ چھ سون ادب بے ادبن ہند کارِ بے کار بنیومُت۔
توے وونُم ۔۔۔۔۔۔۔۔۔۔
سوچان چُھس زہ بہ کیازہ چُھس سوچان۔۔۔۔!!!!
ٹر باز خان