زاہدہ بتول
ڈڈنہ بڈگام
لفظو منزہ ساروٕے کھۄتہٕ زیادٕ میوٹھ تہ مودُر لفظ چھُ موج.خدا وند کریم سندِ طرفہ یوسہ خوبصورت نعمت اَسہ انسانن چھے عطا کرنہ آمژ س چھے موج۔اَتھ نعمژ پیٹھ یوتاہ تہ أسی شُکر کرو سُہ چُھ کم.خداین اگرچہ مول جنتُک دروازہ بنوو مگر ماجہ ہندین پَدین تَل چُھ جنت. اولاد کرتن کاژاہ تہ غلطی مگر ماجہ ہُند دِل چُھ ہمیشہ شُری سندِ خاطرٕ بیقرار آسان تہ چھے پنہ نِس اولادس رژ تربیت کران تہ اصلچ تہ غلطچ پہچان کرناوان.ماجہ لفظس چُھ وادی ہند اکھ بہلہ پایُک شاعر شیر علی مشغول یتھہ کنی پنہ نین شعرن منز ویژھنے کران زِ
منگان چھیکھ ژہ صبحائے دعا میانہ باپتھ
خدایس دِوان چھیکھ نِدا میانہ باپتھ
کوڈُتھ آسہ منزہ پنہ نہ ژاپِتھ میہ دُیت تھم
ژے ہٹہ پیٹھہ کھولُتھ غزا میانہ باپتھ
موج چھی پزی کِنی پننی دادی مشراوتھ سانین دادین دوا کران۔ پانہ فاقہ دِتھ اسہ کھیاوان چاوان۔یعنی ماجہ ہندِس بُتِھس چھینہ کُنہ تہ وِزِ درہ کھسان تہ نہ چھے شُرین ونان زِ میہ کۄر تۄہہ پیٹھ احسان.مگر بدقسمتی چھی یہ زِ اگر یہے موج کُنہ ساتہ زُوہ چھے پُھٹان أمِس چِھ دَکہ تہ ڈُلہ لگان۔یوسہ موج نہ پنہ نِس شُری سُند فاقہ چھے برداشت کران سوئے چھے پتو لاکن اکہ تریشہ دامہ خاطرہ ترسان آسان۔ماجہ متعلقے چُھ اکھ بہترین شاعِر غلام علی پمپوش لیکھان زِ
موج پُوشن پرتھ کانسہ
موج مہ رایِن کانسہ
یمن بدقسمت بچن لوکچارسے منز موج چھے راوان تمہ چِھ یتھہ کنی ویداکھ دوان۔
شامہ برونہے چھس بہ شمع ژھیتہ کران
مایہ چانے چُھم میہ دل اندر دزان
موج لفظُک دویم ناو چُھ محبت،سخاوت،صبر تہ قربانی.موج چھے راتس پانس بے آرامی کرتھ بچس آرام واتہ ناوان تہ أتھی منز چُھ تَمس سکون دل میلان، موج لفُظ چُھ ترین حرفن ہٗند مُیل م یعنی محبت، و یعنی وفاداری تہ ج یعنی جنت۔ یمہ ترینوے چیز چِھ أکِس ماجہ منز نظرِ گژھان۔
پرتھ أکس چمنس دوان سبزار موج
دودونن بخشان چھے شہجار موج
ناز برداری چھے امی سنز بے مثال
بوزوے چھے اُلفتک بازار موج
سون معاشرہ کۄر سوشل میڈیاہن واریاہ خراب ییمہ کِنی أسی پنہ نہ ماجہ ساتی اکھ منٹ تہ چِھنہ کڑتھ ہیکان۔ازکِس نوجوانس چُھنہ پَنُن مول موج اولڈ ایج ہُومن منز سوزنس گال گژھان بلکہ چُھ سُہ کَلہ تھود تھاوِتھ ونان زِ میون مول یا موج چُھ اولڈ ایج ہُومس منز، یُسہ مول موج شُری سندِ باپت پننی زندگی داوس چھ لاگان تمے چِھ پتہ بُڑتھ بے سٗہارہ گژھان۔ اکھ نقاد تہ شاعر رنجور تلگامی چُھ ماجہ متعلق پنہ نِس کلامس منز یِتھہ کنی ونان زِ
آسمانٗک تحفہ رشتن ہندِ وجودچ سر چھے موج
شفقتُک، لولُک، امارُک، محبُتک پیکر چھے موج
ماجہ کانہہ اولاد رُت آسان تہ کانہہ آسان خراب
سارنے عابن تہ اترین پیٹھ تھاواں ژادر چھے موج
اگر نوجوان پنہ نِس مالس ماجہ یتھے کنی بُتھ پھران رودی تیلہ چُھنہ سُہ وق تہ دور زِ اسہ پین گامہ گوم تہ شہرہ شہرہ اولڈ ایج ہوم بناونی۔ اسہ پزہ پنہ نس دماغس ہنا زور دُین تہ مالس ماجہ ہنز خدمت کرنی تاکہ اَسہ میلہ سُہ جنت یتھ ونہ نہ چُھ آمُت زِ جنت چُھ ماجہ ہندین کھورن تل آسان.اسہ پَزہ نہ نادان بَنُن تہ نادانی منز پننی موج تہ مول مشراوُن.نائرہ وحید چھے لیکھان زِ
My mother was my first country,
The first place i ever lived.