سبدر شبیر
اوٹو اہربل کولگام
9797008660
کاینات چُھ اللہ سبحان و تعالی ہن مختلف عجیب و غریب مخلوقاتو ستی بٔرتھ تھومُت یتھ منز انسان اشرف المخلوٗقات چُھن بنوومُت۔ اللہ سبحان و تعالی چُھ قۄرآن کریمس منز فرماوان۔
ترجمہ:
(اَسہِ کور انسان بہترین ساختَس پیٹھ پادٕ)
اتھ منز چُھنہ کانہہ شک زِ اللہ سبحان و تعالی ہن چُھ انسان بهترین ساختس پیٹھ پأدٕ کورمُت۔ تہٕ یتھ منز انسان سُند ذہن چُھن خیالاتن ہنز مشیٖن بنامژ تہٕ یتھ منز کانہہ خیال بنان تہٕ کانہہ خیال بنتھ خأرج گژھان چُھ۔ کُنہ ساتہٕ چُھ انسان سنددس ذہنس منز رُت تہٕ کنہِ ساتہٕ چُھ غلط تہٕ کنِہ ساتہٕ مثبت تہٕ کنِہ ساتہٕ منفی خیالات یوان۔کامیاب زندگی ہند راز چُھ رُت سونچ آسن تہٕ ناکام زندگی ہند تعلق چُھ غلط سونچ تہٕ غلط رویِہ اِختار کرن۔ زندگی ہند پریتھ کانہہ منظر چُھ سونچ ستی پادٕ سپدان تہٕ سونچس پیٹھ ختم گژھان۔ رُت سونچنہٕ ستی چُھ انسانس رتُے حأصل گژھان.أسی ونو یتھ پأٹھ زِ سانین خیالاتن ہند اثر چُھ سانہِ دوہ دش چہِ زندگی پیٹھ سیدِ سیود پیوان . انسان سندس دماغس منز چھِ ہمیشہ خیال یوان روزان کینہہ خیالات چھِ نوٕ آسان تہ کینہہ چِھ واریاہ پرأنی آسان۔ اتھ پرانس تہٕ نوس خیالس درمیان چُھ اکھ واٹھ آسان۔ کُنہ خیال تہٕ سونچنہٕ ورائے ہیکنہ کانہہ مشاہدٕ ،تجربہٕ تہٕ تحقیق سپدتھ۔ کانہہ تہِ مشاہدٕ ،تجربہ تہٕ تحقیق کرنہٕ برونٹھ چُھ انسان سندی خأطر مثبت سونچ آسن ضروری تیلہ ہیکہ مشاہدٕ،تجربہ تہٕ تحقیق کرن وول کامیابی پراوتھ۔مثبت سونچ چُھ ہمیشہ انسانس کامیابی کُن نوان اتھ بر عکس چُھ منفی سونچ انسانس ناکامی تہٕ نامرادی کن واتناون تہٕ زندگی چھِ گاشہٕ منز نیبر کڈتھ انہِ گٹس کن نوان،انسان سندس ذہنس منز چِھ خیالاتن ہند رجحان ہمیشہ جاری روزان تہٕ یہِ چِھ اکھ قدرتی عمل یم خیالات عملہِ منز اننی امیک اختیار چُھ انسانس پانس اَتھِہ. اصل حقیقت چھِ یہِ زِ مثبت خیالات چھِ کانسہ شخصہٕ سنز شخصیت بناونَس تہٕ اتھ منز نِکھار پراونَس منز اکھ اہم کردار ادا کران۔اسی ونو یِتھ پاٹھ زِ مثبت خیال چھِ سۄ ہیر یتھ پیٹھ قدم تھاون وول انسانَ چُھ کامیابی تہٕ کامرأنی حاصل کران تکیازِ انسان سنز پریتھ کانہہ عمل چھِ تندِس ذہنی سونچن تٕہ حرکات و سکناتَن زیر اَثر آسان۔ مثبت یا منفی خیالاتو ستٕی چھُ انسان مختلف عملٕہ سرزد گژھان۔ مثبت خیالاتو ستی چھُ انسان سندس صحتس پیٹھ تہِ مثبت اثرات پیوان تہٕ منفی خیالاتو ستٕی چُھ منفی اثرات پأد گژھان یم ستٕی انسان سُند صحت بے حد متأثر گژھان چُھ. مثبت سونچ چھُ انسان سندی کامیابی تہٕ کامرأنی ہند اکھ بہترین ذریعہ۔ پریتھ کأنسہ انسانس پزِ مثبت خیالات اپناؤنی تہ منفی خیالات ترک کرنچ کوٗشش کرٕنی تہٕ اَمہِ ستٕی چھُ ناممکن تہِ ممکن سپدان.یہ کتھ چھِ وازیہ زِ منفی سونچ چُھ انسان سُند شکل و صورت بگڑاون تہٕ کنہِ ساعتہ چُھ انسانس منفی خیالاتو نش نجات حأصل کرن سیٹھاہ مشکل تہٕ دشوار گژھان تہٕ مثبت سونچ چُھ ولہ ولہ تمن کامیاب انسانن ہنز حقیقتس پیٹھ مبنی کہانی برونٹھ کن انان یمو رتی خیالات اپنأوتھ کامیابی حأصل چھِ کٔرمٔژ تہٕ تِمے لوکھ چھِ کامیابی حأصل کرتھ سماجس منز اکھ مثال قایم کران۔
جدید نفسیات مطابق چھُ وننہ یوان زِ انسان سندی مستقبلک دار مدار چھُ تٔمی سندس سونچن پیٹھ ، تٔمی سنز فکرِ تہ عملہِ پیٹھ آسان. اگر انسان پننہِ سونچنک انداز بدلہِ تہٕ تٔمی سنز زندگی چھِ پانی پانے بدلان .پریتھ کأنسہ انسان سنز خوشی ہند دار مدار چُھ تٔمی سنز پسند، تٔمی سُند انتخاب تہٕ تٔمی سنز فکرِ ہند انداز کیتھ آسہ۔ پرتھ اکھا انسان چُھ پنِس مستقبلس تتھ پأٹھ انتظارس آسان یتھ پأٹھ بۄچھ ہتی وڈونی جاناوار صبحہکس گاشہٕ تارکس منتظر چھِ آسان۔ پریتھ اکھا انسان چھُ حقیقت چو نظرو ستٕی وُچھن یژھان تہٕ امیک تعلق چُھ سیدِ سیود سانین خیالن تہٕ سأنس سونچس ستی ـ رُت سونچ،رُت خیال چُھ انسان سنز زندگی چمکاوان۔ پنیو خیالاتو ستٕی ہیکہ انسان پانس خوش تھاوتھ یا گژھہ غمن منز مبتلا تہٕ امیک دارمدار چھُ سانس سونچس پیٹھ۔ ازکل چھُ انسان مختلف پریشان ین منز مبتلا گومُت تکیازِ مادیتکس یتھ زمانس منز چُھ انسانس سیٹھاہ مشکلاتو منز گزرن پیوان أمس چھِ وقتٕچ سیٹھاہ کمی تہٕ پزرٕچ خوشی حاصل کرٕنی ؤنی دشوار گمژ تہٕ وقتک انسان چھُ خوشی خاطرہ ترسان اَمہِ خاطرہ پزِ اسہ پنُن سونچ، تہٕ خیالات مثبت بناو رت سونچ آسہ تہٕ رت نتیجہ تہ غلط سونچ آسہ تہٕ غلط نتیجہ . سونچنٕہ ورائے گژھنہٕ کانہہ تتھ لفظ ونن یم ستی بیس تکلیف واتہ.کانہہ غلط لفظ غلط رویہ اختار کرنہ ستٕی چھُ کنہ گرس نار تہِ ہیکان لگتھ۔ امہ ستٕی چھُ اسہ یہ فکرِ تران ز سون مثبت سونچ آسن کوت ضروری چھُ۔ ییلہ کانہہ رٕتین خیالاتَن ہنُد مالک شخص چُھ سانہِ خأطرٕ زٕ لفظ رتی بولان تہٕ سُہ شخص چُھ سانس دِلس منز ہمیشہ گرٕ کران۔
غرض پنٕنی زندگی خوشگووار بناونہٕ خاطرٕ پزِ پنین خیالاتن پیٹھ پورٕ پاٹھی قابوٗ کرُن تہٕ ہمیشہ رُت رُت سونچن تہٕ رُت سونچنہ ستٕی ییہ سانہِ زندگی منز تہِ رنگہ رنگہ خوشی، شادمانی بیہ کامیابی تہٕ کامرأنی ہنُد بہار۔