“دل چُھم توشن”

سبَدر شبیر

ینہٕ چانہ سورٕے عالم گوو روشن
دل چُھم توشن دتم دیٖدار
وصَل سپدان زبانی خاموشن
دل چُھم توشن دتم دیٖدار
زند پانہ ییم کور استغفار
تَس گوو راضی پروردگار
نارس گُلزار گوو با ہوشن
دل چُھم توشن دتم دیٖدار
سَر ییم کور پانی پانس اندر
بَر مژرِتھ تس شام و صَحر
گٹہِ منز گاہ تروو أمی پمپُوشن
دل چُھم توشن دتم دیٖدار
فکرِ ستی ذکر ستی ییم کٔرۍ زان
تٔمس پیٹھ چُھے رب مہربان
حاصل کیاہ گژھِہ حق فَراموشن
دل چُھم توشن دتم دیٖدار
رندٕ بنتھ یُس گوو تس پیٹھ فدا
تس نیرن دلکی ساری مُدا
أچھن ستی میول گژھہ اَچھِ پوشن
دل چُھم توشن دتم دیٖدار
سبَدر وون دِس دِلس اندر
پٔھلے لگِہ باغس أندرٕنیبر
پۄنپر گَتھ کر منزجگر گۄشَن
دل چُھم توشن دتم دیٖدار