کتہ کوت چھ واتناوان یارو میہ زندگی

غزل
شوکت ثاقب پوشپوری
کتہ کوت چھ واتناوان یارو میہ زندگی
نئ نئ چھ خاب ہاوان یارو میہ زندگی
مرنہ پتے جواب کیا دمہ تتہ بہ خألقس
سونچتھ کھشس چھ لاگان یارو میہ زندگی
یس بانہ آسہ خألی سوی اکھ وزان چھوی
کم ظرف تریشہ پاوان یارو میہ زندگی
نے چھم کانہہ شکوه نے گلہ کانسہ ہند مگر
پننوی چھ زاگہ روزان یارو میہ زندگی
سرزد یتھوی گژھان چھم پننیو اتھو خطاہ
تیلہ وچھ سزا چھ دیاوان یارو میہ زندگی
زانہہ گژھ نہ کانسہ ہند دل ثاقبؔ کرن ملول
لولچ وتھاہ چھ ہاوان یارو میہ زندگی