ماجد چوہدری /ندائے کشمیر
پونچھ/ ۲۵ جنوری /منڈی// مرکزی زیرِ انتظام جموں و کشمیر کے سرحدی ضلع پونچھ کی تحصیل منڈی کے ماڈل ہائر سیکنڈری سکول ساوجیاں پونچھ میں 13 واں قومی ووٹرز ڈے منایا گیا جس میں کلسٹر ساوجیاں کے سٹاف اور طلباء نے شرکت کی۔ نائب تحصیلدار ساوجیاں عبدالقیوم اس موقع پر مہمان خصوصی تھے اور پرنسپل ماڈل ہائیر سیکنڈری سکول ساوجیاں انور خان نے تقریب کی صدارت کی۔ وہ لیکچررز، اساتذہ اور طلباء جو سخت موسمی حالات اور سکول میں چھٹیوں کی وجہ سے موجود نہیں تھے ورچوئل موڈ میں شامل ہوئے۔ پرنسپل ہائیر سیکنڈری سکول ساوجیاں انور خان نے اجتماع سے خطاب کرتے ہوئے ووٹرز ڈے کے موضوع پر روشنی ڈالی اور اس بات پر زور دیا کہ ہمیں ملک کے جمہوری نظام کو بااختیار بنانے کے لیے اپنا ووٹ کاسٹ کرنا چاہیے۔ پروگرام کا آغاز قومی ترانے کی تلاوت سے ہوا۔ شرکاء کو اسی فارمیٹ میں حلف بھی دلایا گیا جو الیکشن کمیشن آف انڈیا نے جاری کیا تھا۔ مہمان خصوصی عبدالقیوم نے طلباء کو اس دن کی مناسبت سے بھی آگاہ کیا اور ان سے کہا کہ وہ اس پیغام کو کمیونٹی تک لے جائیں۔ انہوں نے طلباء کو یہ بھی مشورہ دیا کہ وہ 18 سال سے زیادہ عمر کے تمام افراد کو ووٹر لسٹ میں اپنا اندراج کروانے کے لیے مطلع کریں۔ شرکاء سے بات چیت کرنے والوں میں محمد شفیع، عارف ملک، عمران خان، مختار بانڈے اور مشتاق بھٹ شامل تھے۔اس موقع پر یوم جمہوریہ کی تیاریوں کو بھی حتمی شکل دی گئی۔
