ایل جی منوج سنہا ، ڈاکٹر فاروق عبداللہ ،عمر عبداللہ اور محبوبہ مفتی نے افسوس کا اظہار کیا
سری نگر ،21/جنوری/ کٹھوعہ ضلع کے تحصیل بلاور کے دھنو پیرول علاقے میں جمعے دیر شام کو ایک ٹیمپو گہری کھائی میں گرنے سے پانچ مسافروں کی موت ہوگئی اور 15دیگر زخمی ہوگئے۔ یہ حادثہ پولیس تھانہ بلاور کے دائرہ اختیار میں اُس وقت پیش آیا جب مسافروں کو لے کر ایک ٹیمپو کوگ سے دھنو پیرول کی طرف جا رہا تھا کہ دھنو پیرول کے قریب سیلا پہنچنے پر بارش کے بعد سڑک پر پیدا ہوئی پھسلن کی وجہ سے 100سے 150میٹر گہری کھائی میں جاگرا، مقامی افراد نے فوری طورپر موقع پر پہنچ کر امدادی کارروائیاں شروع کردیں۔ بعد ازاں ایس ایچ او سنیل شرما کی قیادت میں پولیس تھانہ بلاور کی ایک ٹیم بھی جائے حادثہ پر پہنچی اور ریسکیو آپریشن شروع کیا۔
ریسکیو ٹیم نے موقع پر ہی چار مسافروں کی لاشیں برآمدکیں جبکہ شدید زخمی 16مسافروں کو بچا کر طبی امداد کے لئے سب ضلع ہسپتال بلاور منتقل کردیا گیا۔
بعد ازاں زخمیوں سے ایک جس کی شناخت کاکو رام ولد کرشن چند کے طور پر ہوئی ایس ڈی ایچ بلاور میں زخموں کی تاب نہ لا کر چل بسے جس سے مرنے والوں کی تعداد پانچ ہو گئی۔ دیگر متوفین کی شناخت منٹو ولد ایشر داس ، ہنس راج ولد منشی رام ، اجیت سنگھ ولد رام چند ، ہنس راج کی اہلیہ امرو کے طور ہوئی ہے۔
ذرائع نے بتایا کہ شدید زخمی ریشما بیگم اور نیلم نامی دو مسافروں کو بعد میں مزید علاج ومعالجہ کی خاطر جی ایم سی کٹھوعہ منتقل کیا گیا ہے۔ پولیس نے اس سلسلے میں ایک کیس درج کرکے مزید تحقیقات شروع کی۔ ادھر نیشنل کانفرنس کے صدر ڈاکٹر فاروق عبداللہ اور نائب صدر عمر عبداللہ نے ضلع کٹھوعہ کے بلاور میں جمعہ کی شپ سڑک حادثے میں 5افراد کے لقمہ اجل بن جانے پر زبردست رنج و الم کا اظہار کیا ہے۔
دونوں لیڈران نے حادثے میں لقمہ اجل بنے افراد کے اہل خانہ اور لواحقین کے ساتھ دلی تعزیت کا اظہار کیا ہے۔ انہوں نے لقمہ اجل بنے کے لواحقین کو یہ صدمہ عظیم برداشت کرنے کیلئے اللہ سے دعا مانگی۔ انہوں نے حکومت سے اپیل کی کہ وہ زخمی ہوئے افراد کو بہتر سے بہتر علاج و معالجہ یقینی بنائے اور لقمہ اجل بنے افراد کے پسمادگان کے حق میں ایکش گریشیا ریلیف فراہم کی جائے۔