آفاقؔ دلنوی
مقامِ کُن فیکونُک پناہ پراوُن مے گو مُشکل
مے گو مُشکل محمدﷺ رہنما تھاوُن، مے گو مشکل
گیم یلہ بانگ گوشن دول دیتھ رودُس بہ منساواں
خدایس برونٹھ کنہِ کبرُک یہ سر تراون مے گو مشکل
خطا کاری اندر رودُس گزاراں دوہ خطا زد چُھس
اتری کری کری بہ سپدُس مس عفو ژھارُن مے گو مشکل
دیواں رودس بہ دینکی دم براں رودس فسادن گوڈ
چھ کیا حق تے چھ کیا باطل یہ پرزناون مے گو مشکل
نفع نقصان گنزراون توگُم بس دنیہس باپتھ
تہ عقباکیوتھ تہ کانہہ سامانہ سومبراوُن مے گو مشکل
نبھاوُن ساتھ طاغوتس مے زونُم فرض کھوتہ افضل
سبق پزرک پرتھ پتہ بیاکھ پرناوُن مے گو مشکل
خداین دیوت مے مال و زر شُکُر اونم بجا پوتلین
وچھس منز کلمۂ توحید رسراوُن مے گو مشکل
بہ آیوس وعدء دیتھ قالو بلا پتہ ما یہ زانہہ پولُم
چُھ کیا ایمان ہیچھناواں یہ ویژناوُن مے گو مشکل
رقم سُودک مے تھووُم منز جمع خاتن تہ سپدُس خوش
مگر اسلامہ خاطر آنہ خرچاوُن مے گو مشکل
کتاب اللہ تھوم تاخچس پیٹھ بس نمائش کیوت
تہ اتھ اندر لیکتھ آین تِہ کن تھاوُن مے گو مشکل
یہودی سازشن رودس دیواں تن کلمہ گو آستھ
مسلماں قافلس کیوتھ پان پوراون مے گو مشکل
زبانی کور مے سخ تبلیغ توحیدُک تہ قرآنُک
مگر سینس اندربت خانہ نہناون مے گو مشکل
کؤرُم منز منبرن پرچار فرضی واقعاتن ہوند
حدیثِ نبویکﷺ معنی لُکن باوُن مے گو مشکل
گزراں زندگی رودُس بہ وپرن ہنزِ خوشی خاطر
تہ مالِس ماجہ اتھہ کنہ آیہ شہلاوُن مے گو مشکل
کرِتھ آفاقؔ اترافی خطا کھولم مے شیطانس
حرامُک لانجہ لد سرمایہ ٹھکراوُن مے گو مشکل
آفاقؔ دلنوی
دلنہ بارہمولہ کشمیر
رابطہ نمبر 7006087267
