خورشید خاموشنی ’’تیزاب تہ تریش‘‘ میانین نظرن منز 0

خورشید خاموشنی ’’تیزاب تہ تریش‘‘ میانین نظرن منز

بشیر اطہر
7006259067

دنیاہس منز چھ کینہہ لُکھ تمہ آسان یمہ پننہ خداداد صلاحیژو کِنی مشہور چِھ سپدان تہ لُکن ہندین دلن پیٹھ چھہِ پنن راج چھ قایم کران- تمن ہنز قابل داد صلاحیت وُچھتھ چھُ انسانس رشک گژھان۔کینژن چھُ خدا لیکھن تراش بخشان تٕہ تمہ چِھ پننہ قلمہ تِتھ دُر برونہہ کُن انان زِ زبان چھے لول بران ،ادب چُھ سلام کران تہ ادبی لُکھ چِھ داد دِوان.یتھسے أکس کاشرِ زبانی تہ ادبکس شہسوار سنز کتاب تیزاب تہ تریش چھے وُنی کن میانین اتھن منز موجود۔امہ کتابِ ہُند مصنف خورشید خاموش چھُ وادی کشیرِ ہندین جوان شاعرن ہنزِ تارکھ مالِہ ہُند اکھ لوبہ وُن تہ شوبہ وُن تارُکھ یُس کاشر زبانی تہ ادبس وقتہ وقتہ گاشراوان روٗد.اُمن ہُند کلہم کلام چُھ گُلابن ہندی پاٹھی مُشکنی ادفر ژھٹان تہ عاشق مزاجکی لُکھ چِھ اُمن ہندس کلامس وُیور تُلتھ پننی زندگی میٹھ تہ مودر بناوان.اُمن ہُند حمدیہ کلام چُھ کَلین زیو انان تہ تمہ چِھ پتہ پننہ مودرِ ہٹہ یہ باوتھ کران زِ
نوحس ژٕ لمان ناوِ تہ ژے نارٕ پھالاں پوش
طورس ژٕ کراں سور تہ نيٖلس ژٕ عصا ہُیو
اگر زن امہ شعرٕ کس گوڈنِکِس مصرس منز گژھہ ہے آسُن زِ
نوحس ژٕ لمان ناوِ تٕہ ژےٕ نارٕ پھولراں پوش
اتھ شعرس منز چُھ پھولراں بدلہ پھولاں استعمال سپدمت یہ چُھ بحر رلاونہ خاطرٕ جان گومُت مگر معنی لحاظ چُھ اتھ منز سون ووگُن گژھان.مگر یہ حمدیہ کلام چُھ خداوندعالم سٕندی ساری وصف برونہہ کُن تراوِتھ یہ ونان زِ
چُکھ جلوٕ دوان عام گہے سریہ گہے زون
گاہ یار ونس منز میہ لوبُکھ سروٕ کُلا ہُیو
خورشید خاموشن نعتن منز چُھ مولائی رنگ نظر گژھان تہ باسان چُھ یمن ہٕندی نعت چِھ بزبانِ خورشید کُس تام خاموش انسان أندری سجاوان تہ سجاوٹ دِتھ چُھ خورشید خاموش ونان زِ
میہ یامتھ نعت لُھن ہیت قلم لاگ کرنِہ کتھ پانے
اَچھر گٔے ڈھیر ہم قافی بحر لٔج کڑنہ وتھ پانے
نتہ چُھ ونان زِ
نٔنس ریتہ کالی تاپس شبنمُک آثار ہُیو پھیورُم
مے یامتھ ژورِ پاٹھین پت کُٹِھس اندر سرُم نعت
خورشید خاموشِن منقبت تہ چِھ مضروب دِلن نؤ زندگی بخشان تہ تِہنٔدی دِل وُزناوِتھ چُھ تمن پرناوان زِ
سیکلِ صحرا دٔدسہ ہوت پوز تریش ہمراواں حسینؑ
نوکِ نیزن پٹھ نبی سندی نعت پرناوان حسینؑ
تہ کُنہ ساتہ ونان زِ
شوقن رٔچھی مٕتی ٲسی یم گُل محبوبنؐ وُچھ
ؤتھرو ؤتھرو ديٖنس تِم پاراوس لٔگی متی
خورشید خاموشن چُھ تیزاب تہ تریش کتابِ منز کٔشيٖرِ ہندِس بہلہ پایہ کِس صوفی ولی محبوب العالم سُلطان العارفین حضرت شیخ حمزہ مخدومؒ صابنس حضورس منز تہ اکھ منقبت لیوکھمُت اتھ منز أمس تھدِ پایہ کِس ولی سٕنزِ زندگی ۂندی دینی کارنامہ گاشراونہ چِھ آمتی تہ چِھ ونان زِ
محبوب خدا چھکھ تہ ژٕ محبوب کشیرے
مخدوم شہا چُکھ ژٕ وللہ شوب کشیرے
نظرا مے کرم خاک بنیم أنی سونٕے سون
چُکھ ٹوٹھ خدا سٗند تہ ژٕ مرغوب کشیرے
یہ کتاب چھے وادی کئشيٖرِ ہنٔدی أکی مشہور شاعر تہ قلمکار گُلشن بدرنی صأبن جان پاٹھی ترتیب دِژمژ مگر کینژن چیزن ہُند خیال چُھنہ تھاوٕنہ آمُت سُہ گو یہ زِ حمدٕ پتہ چُھ نعت تہ نعتیہ کلامہ پتٕہ منقبت. مگر منقبت گژھہ ہے گاڈہ امام حسینؑ سُند آسُن تہ تمہ پتہ گژھہ ہے مخدومؒ صابن منقبت لکھنہ یُن. ییمک زَن ادبہ علاوٕ مزہب تِہ چُھ تقاضہ کران۔
خورشید خاموش چِھ نوجوان پُیہ ہنٔدی اکھ کُہنہ مشق شاعِر تہ یِمن ۂندس کلامس منز چِھ سونہ ساوی لفظ ورتارنہٕ آمتی، یہندس کلامس منز چھُ درد تہ ورتارنہٕ آمُت۔ امہ کتابہ ہُند ناو چُھ خورشید خاموش نِہ اکہ غزلہ منز ژارنہ آمُت غزل چھے شُوبہ دار تہ توے چُھ کتاب ہُند ناو تہ شوبہ وُن۔
بس مے زے چیز چِھ درکار زّ تیزاب تہ تریش
أتھی کرُن چُھم میہ ؤں باپار زِ تیزاب تہ تریش
خورشید خاموش نِس کلامس منز چُھ درد بٔرتھ اَمہ ستی چُھ یُہند کلام انسانس اندٕری اندٕری دگ وتلاوان
تس تہ آسیا دود دگ تے بے قراری میانی پاٹھی
تس تہ آسیا کانسہ ہنز وُنہ انتظاری میانی پاٹھی
خورشید خاموشنس کلامس منز چھے سماجچ عکاسی تہ یَسلہ پاٹھی کرنہ آمژ اما پوز یہ عکاسی چھینہ ننہ وانہ کرنہ آمژ بلکہ چھے اشارن تہ کناین منزے ورتارنہٕ آمژ۔ یتہ چھے یہ کتھ وننی ضروری سپدان زِاشارو تہٕ کنایو ساتی چُھ أکس شاعِر سُند کلام شوبہ وُن تہ لوبہ وُن بنان مگر شرطِ اوّل چُھ یہ زِ اشارہ تہ کنایہ گژھن تگٕنی ورتاونی۔امہ خاطرٕ گژھہ شعرؠٹھہی گاٹُل آسُن۔ خورشید خاموش چُھ اتھ شرطس پٹھ پوٗرٕ پاٹھی وُتران۔
دروگ أنتھ ساگ چھسکناں نایاب چیز
شہر یارن ٹار کھت باپار میون
گرگٹکی پاٹھی بو چُھس بدلان مزاز
شام اکھ صبحس بدل انہار میون
ونہ نُک مقصد چُھ یہ زِ خورشید خاموش سٕنز کتاب تیزاب تہ تریش چھے پریتھ لحاظہ انسانس ٹارِ کھسان.اتھ منز چھے کہی یا غزلہ تہ نظمہ دادٕ ہَرٕکی پاٹھی میچھر دِوان. اتھ کتابِ چُھ واریاہو ادیبو پَنُن تبصرہ پیش کورمُت یمن منز گلشن بدرنی ،پروفیسر گلشن مجید تہ سید بشیر کوثر قابل ذکر چِھ۔
خورشید خاموشن چھے پننی یہ کتاب یعنی تیزاب تہ تریش پنہ نِہ ماجہ کُن منسوب کرمژ ییمہ کِنی یمو پنہ نہ ماجہ ہُند حق نکھہ والہ نٕچ کوشش چھے کرمژ مگر سو چھینہ جسمانی طور اتھ دنی یاہس منز موجود۔خدا کرنس جنت عطا۔۔۔
یِم ماجہ ہندی دعا مے یُتھوئے ساتی چِھ نیران
بس با خدا مدعا مے تِتھوئے کاتی چِھ نیران.
غرض خورشید خاموش چِھ عصرِ حاضرٕکی اکھ بہترین تہ با حوصلہ جوان قلمکار تہ شاعر یِمہ بزمِ ادب بٹہ پورہ کانہامِکی ڈؠکہٕ ٹیکہٕ تہ چِھ.یہنزِ اَمہ کتاب ستی سپدیاو کاشرِس زبانی تہ ادبس منز ہُریر.میانی رائے چھے زِ پَرن والی نوجوان گژھن امہ کِتاب ہُند مطالعہ ضرور کرنی تہ پنہ نِہ زبانی تہ ادبس پوچھر دِنی۔
����

اس خبر پر اپنی رائے کا اظہار کریں

اپنا تبصرہ بھیجیں