بشیر اطہر
وادی کشیرِ منز چِھ پتہ وتہ پيٹھے واریاہ بہلہ پایک ادیب ،قلمکار،شاعر تہ نقاد تھنہ پیمتی۔یمو شاعرو تہ قلمکارو چُھ سانی کاشرزبان تہ ادب رٔژھراونس منز اَکھ اہم رول ادا کورمُت۔ یمنے بہلہ پایہ کین قلمکارن منز چُھ اکھ سُہ ناو تہ شامل یمو سانی زبان أکس تِتھس مقامس واتناو نک اسہ تصوُرے اوس نہ یعنی یمو واتٕناو سانی زبان أکس تٔھدس مقامس۔أمسے تھدِ پایہ کِس ادیبس چُھ ناو محمد رمضان شاہ یُس أسی عام پاٹھی شاد رمضان ناوٕ ستی زانان چِھن۔ شاد رمضان چِھ اکھ سا چھجل بونی ییمہ کِس چھجس تل واریاہ تھٔکمتی تھک دِتھ پن پنہ نِس مقامس تہ منزلس واتی یعنی یمو کٔری پنہ نہ علمہ تہ ادبہ ستی واریاہ ادیب تہ قلمکار فیضیاب تہ کیاز یمہ رودی واریاہس کالس یونیورسٹی منز بحیثیت پروفیسر پننی فرائض نکھہ والان۔شاد رمضان صابن بور کاشِرِ زبانی تیوت لول زِ یہ زبان واژ مُلکہ کین کونن کونن منز۔بیاکھ اکھ صفت یوسہ شاد رمضان صابس منز چھے سو چھے یہ زِ یمہ رٗودی ادبی اجارہ داری نِش واریاہ دور تہ توے چھے أمِس نِش لۄکٹین تہ بڑین کُنی نظر وجہ چُھ یی زِ یِمن ہندین اتھن تل پھانپھلے واریاہ بٔڑی بٔڑی ادیب تہ قلمکار۔
شاد رمضان چِھ اکھ بہترین شاعِر آسنہ علاوہ اکھ بہترین قلمکار ،محقق تہ ترجمہ کار تہ یمن چُھ “کور کاکُد گوم پُشرتھ” کتاب پیٹھ 2014ہس منز ساہتیہ اکیڈمی ایوارڈ دنہ آمُت۔ شاد رمضانن چِھ واریاہ تحقیقی مضمون لیکِتھ کاشرین طالب علمن ہندِ خاطرٕ اَکھ بڈ خزانہ تروومُت۔یمن ہنزن کتابن منز چھے ’’”اتھ ظلماتس لعل کیاہ چِھ تَے” ‘‘سہل چھا معنی بوزُن، شعر تہ شرح”علاوہ چھے یمو کاشرین لٗکہ باتن ہُند انتخاب، ساہتیہ اکیڈمی ہندِ خاطرٕ ترتیب دِژمژ۔شاد رمضانن چُھ پنہ نین کتابن منز مولُل خزانہ بٔرتھ کاشِرس ادبس پوچھر دُیتمُت۔یمن ہنز سنجیدگی چھے یہندس کلامس خوش یِوُن بناوان۔یمن ہندِس کلامس رٗودی کہی یا کاشر طالب علم ہَر تُلان۔یمن ہُند سونہ ساوی کلام چُھ شوبہ وُن تہ لٗوبہ وُن یعنی یمن ہندِس کلامس چُھ مانچھ پریڑان۔اگر وُچھو یِمن ہُندِ کلامُک میٗوٹھ آسُن چُھ یُہند حُسنِ اخلاق یعنی شاد رمضان صآبنی اخلاق چِھ واریاہ تٔھدی تہ بٔڈی۔یمن ہُندس گفتارس چُھ زنہ نابَد آسان مِلوِتھ۔شاد رمضان چِھ اکھ بہترین تنقید نگار تہ یمن ہُند تنقید چُھ معتبر ماننہ يِوان۔یہ تہ چھے اکھ حقیقت زِ کُنہ کلامس پیٹھ یا کُنہ کتابہ پیٹھ تنقید کرُن چُھ وُنی کِکس دورس منز افروَٹس اٹہ کرنس برابر تہ کياز عام قلمکار تہ شاعر چِھنہ پنہ نِس کلامس تنقیدکِس نقطہ نظرس پیٹھ پرکھاوُن یژھان۔شاد رمضانن چھے تنقید علاوٕ ترجمہ کاری ہنز کام تہ مٹہ ہیژمژ ۔اتھ منز اُمو واریاہ افسانو علاوٕ کہی یا شاعرن ہندس کلامس تہ کاشُر ترجمہ کٔرِتھ کاشِر زبانی پٹھ اکھ احسان چُھ کورمُت۔شاد رمضان چِھ اکھ معتبر محقق یمن ہُند تحقیق چُھ ہمیشہ وزن دار آسان تہ کیاز یمہ چِھ پَنُن تحقیق تواریخس اندر بیان کران۔ شاد رمضان نین کامین اگر شمار کرو تیلہ ہیکہ تمن پیٹھ اکھ بٔڑ بارہ کتاب بٔنتھ۔تمہ خاطرٕ چُھ وخ آسنس ستی ستی واریاہ چیز تہ درکار اننی۔اگر شاد رمضان نِس کلامس سام ہیمو یُہند کلام چُھ زیاد پہن آزاد نظمن پیٹھ مُشتمل تہ کياز یہند آزاد نظمہ لیکُھن چُھ اکھ وجہ یہ تہ زِ یمہ چِھ پانہ تہ آزاد خیال تہ آزاد طبیعت انسان۔یمن چُھ لل واکھ تہ کلام شیخ نورالدین ولیؒ پیٹھ واریاہ دسترس حاصل یمہ یلہ تہ کانہہ کلام چِھ کرن ہیوان تتھ منز چھُ لل دیدِ ہندین واکھن تہ شیخ العالم سندین شُرکین ہُند ذکر ضرور آسان۔
شاد رمضان چِھ کاشِرِ زبانی ہندِ خاطرٕ پننی گاشہ مشعل ہیتھ کاشرِ زبانی ہندین بہی خواہن ہمیشہ گاشراوان رُودمتی۔ از تہ چِھ ہتہ وادہ کاشر سکالر یہندس علمس ویُور تُلان تہ پنہ نِس علمس ہُریر کران یعنی یمہ چھنہ پانے یوت شاد بلکہ چِھ یمو پننہ علمہ تہ ادبہ ستی باقی تہ شاد کرمتی -شاد رمضان چِھ باگہ بورُت محقق تہ قلمکار یُہند باگہ بورُت آسُن چُھ کاشِرِ زبانی ہندِ خاطرٕ فخر یعنی کاشِرِ زبانی تہ چُھ یہ اعزاز حاصل زِ اتھ چُھ شاد صابس ہُیو ادیب، قلمکار تہ محقق حِصس آمُت-یمہ چِھ لوکٹین لوکٹین قلمکارن ،شاعرن تہ سکالرن ہمیشہ حوصلہ افزائی کران رُودمتی ییمہ کِنی یِمن ادبی حلقن ستی وابستہ لُوکَو علاوہ عام لُکھ تہ چھ عزتہ چو نظرو وُچھان-یہندِ کتھ کرنُک وطیرہ چُھ سیود تہ سادہ آسان تہ یمہ یوسہ کتھ ونان چِھ سۄ چھے عام انسانس تہ فکرہ تران-تتھ منز چِھنہ مُبہم الفاظ یا محاورن ہُند دخل آسان أسی ہیکو سادہ الفاظن منز یہ تہ ونتھ زِ یُہند اسلوب چُھ سیود تہ سادہ مگر یِمن ہنز فکر چھے سانِین ذہنن ہندی دروازہ وا کران-بہ چُھس پَنُن یہ شعر شاد رمضان صابس ارپن کران زِ
ژے شوٗبی ڈالی پوشن ہنز وطیرس
تہ قلمس آئی ہُرنے شاد صابا
کاشر زبانی ہندین قلمکارن تہ ادیبن پَزِ شاد رمضان صابس ہِوین قلمکارن ہمیشہ لول بَرُن تہ کیاز یِتھ ہوی قلمکار چِھ اکہ زبانی ہندِ خاطرٕ اَکھ بہترین اثاثہ تہ شُوب آسان-خدا وندِ عالمس کُن چُھس دعا گو زِ شاد رمضان روزِن ہمیشہ شاد تہ روزن کاشِرس ادبس تہ زبانی ہمیشہ لول بران-
���
بشیر اطہر
7006259067
