بشیر اطہر
7006259067
لفظ صوفی چھُ سُہ اکھ اہم مگر پیچیدہ لفظ ییمچ فلاسفر تہ نقاد پن پننہِ آیہ تہ پنہ نِہ علمہ حسابہ ویژھنے چِھ کران۔ عام فہم زبانی منز چُھ وننہ یوان زِ صوفی گے تمہ شخص یمہ دنیاہُک لوح لنگُر اوک طرف تراوِتھ خدایہ سنز وتھ چِھ رٹان تہ چِھ کُنہ بِدون تہ خلوتچہ جایہ بِہتھ خدایہ سنز عبادت کرنس منز مشغول روزان۔ تہ کینژن ہُند ونُن چھُ یہ تہ زِ صوفی چِھ خدا وند عالمینن ازلہ پٹھے بشری کدورتو تہ غلاظتو نِش آسان پاک تہ صاف تھاومتی۔
علامہ ابو ریحان البیرونی چِھ پننہ کتابہ”کتاب الہند” دس منز لکھان ز ‘صوفی مطلب گو فلاسفر تہ ‘صوف معنی چُھ فلسفہ۔ تمہ چِھ مزید لکھان زِ صوفی چُھ مزہبی تہ اخلاقی عالمس منز اکھ خاص حیثیت تہ مقام تھاوان۔
مشہور تواریخ دان پنڈت کلہن تہ چِھ ہننِہ مشہوٗر کتابِ “راج ترنگنی” ہندِس گوڈنِکسے بابس منز اَمہ کَتِھہ ہُند انکشاف کران زِ سانی وادی جموں و کشمیر چھے سخی اَتھو تِتِھہ فطری حُسن تہ کٔششہ ستی نوزِمتی زِ اَمہ کن برف پوش پہاڑن، سرسبز جنگلن تہ صاف شفاف تہ مودرؠن ناگن نزدیک بسن والی لُکھ چِھ نہ کُنہ تہ دورس منز روحانیت تہ مزہب پسندی نِش پتھ روٗدِمتی یعنی یتہ چُھ ہمیشہ صوف وسلوکُک چلے جاو رودمُت۔
تواریخُک غورہ سان مطالعہ کٔرِتھ چُھ اَسہ ییمہ کَتِھ ہُند علم حاصل سپدان زِ روحانیتس چھے پرانہ زمانہ پٹھے اہمیت لٔجی مٕژ۔ یتہ چُھ بُدھ بھکشو، سَنتو تہ صوفیو پریتھ دورس منز صوفیَتُک پرچار کرمُت تہ پننِہ زندگی ہُند اکھ لائحہ عمل طے کورمُت تہ پَن پننِس دورس منز چُھ رائج زبانین منز مواد اَز تہ موجود۔۔۔ ریشیَتن یوسہ کاشِرِ شاعِری منز تصوُف بھگتی قائم تہ دائم چھے تھاومژ تمچ مثال چھے اسہ از تہ لل دیدِ ہندین شعرن منز نظرِ گژھان۔۔۔
ہوپاری چُھ علمدار کشمیر حضرت شیخ العالم شیخ نورالدین نورانیؒ ۂندین شُرکین منز تہ صوفیتچ لَے پورہ پاٹھی نظرِ گژھان تہ تِمہ شُرکی چِھ اَز تہ لُکن ہندِ خاطرٕ ہدایت تہ رہبری ہنز مشعل روشن کران۔لل دیدِ تہ نند ریشس پتہ چُھ حبہ خوتُونِ ہُند ناو تہ اہمیت تھاوان۔۔۔
یعنی أسی ہیکو یہ ؤنتھ زِ کشیر چھے پتہ وتہ پيٹھے صوفین ،سَنتن تہ پيٖرن فکیرن ہنز جائے روزمژ ،یؠتہ چھ کہی یا تھدِ پایک صوفی بُزرگ تھنہ پیمتی۔ ونہ نہ چُھ یوان ز کشیرِ منز چُھ صوفیَتُک ابتدا ژوداہمہ صدی منزے سَپدمُت. اگرچہ یور اہل صوف وسلوک واریاہ کالی چِھ آمتی مگر یمن ہندی نظریات واتی طرفن طرفاتن تہ سپزکھ عوامچ پزیرائی حاصل۔ اوہ مۄکھہٕ چھُہ یہ تہ وننہ یوان زِ کشیرِ ۂندی گۄڈنِیک صوفی بزرگ چھ حضرت شرف الدین عبدالرحمٰن بُلبُل صاب ٲسمتی۔ تواریخ دانن ہُند چھُ یہ تہ وَنُن زِ برونہہ تہ ما آسہ ہن کشیر منز صوفیتس سٕتی وابستہ مگر تِہُند تواریخ چُھنہ لیکھنہ آمُت۔
بلبل شاہ صابنہ پتہ چُھ یہ سلسلہ پکان رودمت تہ رودِی واریاہ صوفی بزرگ برونہہ کُن یوان تہ پنہ نہ کلامہ، کردارٕہ، گفتارہ تہ ؤطیرہ ساتی سالکن تہ عام لُکن ہُند زان پانس کُن پھران تہ اَمِہ سلسلہ چِھ تسبیح ساتی رود اکہ اکہ دانُک ہُریر سپدان. یہ کتھ تہ چھے وَننی لایق زِ صوفیَتُک سلسلہ چُھ اکہ تسبیح ہندی پاٹھی اکھ أکس ساتی جُڑتھ آسان تہ چُھ پے در پے اَمے سلسلک مایہ پکان روزان تہ صوفیَتُک یہ کُل چُھ دوہہ کھۄتہٕ دوہہ واش تہ کاڈ کڑان،صوفی چُھ پننی زندگی داوس لاگتھ بییَن ہنز زندگی بالہ بَٹھین کھالہ نچ کوشش کران۔ تہ چِھ پزی پاٹھی پنہ نن سالکن،محِبن تہ مانن والن پننہِ مَنُک ژونگ زالتھ گاش ہاوان رودمٔتی. تہ چھیکھ پنہ نہ منچ کتھ سیدین تہ سادن لفظن منز پیش کٔرِتھ اسہ تام واتناونچ کوشش کرمژ۔۔۔ نقادن ہُند ونن چُھ زِ صوفیت کس سلسلس تھپھ کرن والس گژھن کینہہ چیز ضروری آسٕنی یعنی اکھ صوفی بُزرگ گژھہ وحدت الوجود یا وحدت الشہودک تہ قائل آسن بییہ گژھیس ربوبیت الٰہی یُک علم تہ آسن تہ پتہ چھے تٔمی سنز کتھ یا کانہہ پیغام انسان سندس دلس تٔرتھ گژھان تہ اثر کران۔فلسفین ہُند ونن چھُ زِ فلسفہ وحدت الوجود یعنی Pantheism مُک سادٕ مطلب چُھ زِ خدا چھُ کائنات تہ کائنات خدا اَمہ علاوہ نہ چُھ کم تہ نہ زیادہ.. اَمے فلسفکی بانی شیخ محی الدین ابن عربی چِھ ونان زِ۔۔۔
وَفِی کُلَ شیٔ لَہٗ آیَتہ
تَدُلُ علی اَنہٗ عَینُہ
یعنی کائناتکِس پریتھ چیزس منز چھے امہ حقچ دلیل موجود زِ سُہ چیز چُھ عین اللہ۔۔۔
یؠلہ زن ابن عربی سندی کینہہ پیروکار آسنہ باوجود چِھ ونان زِ۔۔۔۔
العبدُ عبدٌ واِن ترفع
ولرّب ربٌ وَاِن تنزل
یعنی بندہ چُھ بندہ آسان خواہ سُہ کوتاہ تہ تھود کھسِہ تہ رب چُھ رَبے خواہ سُہ کوتاہ تہ بۄن وَسہ..
یہ زن میہ برونہے عرض کۄر زِ تصوف چھُ زمانہ قدیم پيٹھے اکھ اہم مگر پیچیدہ موضوع رودمُت تہ اتھ منز چِھ زہ اہم نظریہ اکھ الگ حیثیت تھاوان۔ یہے وجہ چُھ زِ یمہ زٕہ فلسفہ چِھ قرآن تہ سُنتکی مرکزی مضمون. مگر تصوفچ تہ فلسفچ زبان چھے بیون، مشکل تہ پیچیدہ تِہ. اَمہ حوالہ چِھ جدید فلسفی، نقاد تہ قلمکار نَکھ موران رُودِمتی۔ تہ یہے چُھ وجہ زِ اتھ موضوعس پٹھ چھِنہ جدید تہ آسان زبانین منز تحریر اَسہ برونہہ کنہ موجود یمہ کِنی موجود دورٕکی جوان کو نوجوان اَتھ اہم موضوعس پٹھ واقفیت چِھنہ تھاوان یا چِھ اتھ تنقیدی نظرو وُچھان تہ نَتہ چِھ منحرف سپدان۔
اگرچہ تصوُف حوالہٕ امکین بانین ہنزہ کہی یا کتابہ موجود چھے مگر تمہ کتابہ چھے باقین زبانین منزے لکھنہ آمژہ یمہ کِنی تِمہ سمجھنس منز اَسہ واریاہ مشکلات چِھ بُتھہ یوان۔
منصور حلاج سنز کتاب “الطوسین” نس منز چھ ازل، خدا، تخلیق، شجرہ تہ نورِ خدا ہِوین اہم موضوعاتن پیٹھ قلم تُلنہ آُمت۔یلہ زن امام غزالیؒ ہَن پننہِ کتابہ “احیاء العلومس” منز تصوفس متعلق کافی بحث چُھ کورمت۔ وحدت الوجود نظریکی بانی اِبن عربین چھے اَمہ حوالہ پننہ زٕہ اہم کتابہ “فصول الحکم تہ فتوحات مکیہ” برونہہ کُن أنتھ اتھ موضوعس واش کوڈمت تہ یمن کتابن ہُند مطالعہ کرنہ ساتی سپدِہے سانِس علمس منز ہُریر مگر یمہ چھے وُنہ کینس نایاب۔
ہوپاری چھے وحدت الشہودکی بانی شیخ احمد سرہندی سند مکتوبات تہ شاہ اسماعیل سنز “عبقات” وحدت الوجود تہ وحدت الشہودکس تطبیقسے پٹھ لکھنہ آمتی. اَمہ کِنی چھے اَسہ اکھ کتھ واضع سپدان زِ وحدت الوجود تہ وحدت الشہود چِھ زٕہ مختلف موضوع مگر یمن چُھ پانہ وانی واٹھ یعنی یمہ چِھ Interlinked…یعنی یہ چُھ ظاہر سپُدمت زِ وحدت الوجود تہ وحدت الشہودٕکی دونوے فلسفہ چِھ ذات باری تعالٰی تہ مخلوقاتٕکی تعلقات بیان کران تہ تصوُفچہ زبانی منز چھ اتھ توحید عینی تہ توحید ظلی تہ ونان.
شہاب الدین سہروردی یمہ سُہروردی سلسلکی بانی تہ چِھ سٕنز “عوارف المعارف” مولانا عبدالعلی سُند رسالہ “وحدت الوجود” زیدالحسن فاروقی سنز کتاب “الصباح المقصود” غلام مصطفیٰ خان یمہ زن سندھ یونیورسٹی منز بحیثیت پروفیسر پننی فرائض انجام چِھ دِتمٔتی سنز کتاب “لوائح خانقاہ مُظہریہ” مُلا تیمور سُند قلمی نسخہ “شریعت وطریقت” تہ مکتوبات لعل بدخشان ہوی نسخہ تہ کتابہ چھے یہ موضوع سمجھنہ خاطرٕ اہم تہ بنیادی مآخز یا تحریر موجود. پروفیسر غلام مصطفیٰ خانن “لوائح خانقاہ مظہریہ کتاب چھےسلسلہ مظہریکی دان ہتَن مکتوباتن تہ معجزاتن پٹھ مشتمل کتاب تہ یہ چھے دان بابن پٹھ مشتمل. گۄڈنیُک باب چُھ باب مُظہرؒ تہ دایم باب چُھ باب نسیم۔ اَمہ کتابہ ہُند مطالعہ ہیکو أسی ریختہ چِہ ویب سائٹہ پٹھ بڑہ جان پٹھی کٔرِتھ۔۔۔
بیاکھ اکھ اہم کتاب “شریعت و تصوف” چھے مسیح الامت حضرت مولانا شاہ محمد مسیح اللہؒ تہ حکیم الامت مُجدد ملت حضرت اشرف علی تھانویؒ یَن یِکہ وَٹہ ترتیب دژمژ یوسہ فنِ تصوفس متعلق مکمل تہ مدلل کتاب چھے۔تہ چھے اکھ ٹاکارٕ حقیقت زِ کشیرِ منز چِھ تصوُفکی تمام سلسلہ ایران تہ ایرانکی علمی سرحد عراقکی پیداوار۔کشیر منز تہ چِھ صوفیت تہ صوفی شاعرن متعلق واریاہ تنقیدی تہ تحقیقی مقالہ تہ کتابہ چھاپنہ آمژٕ۔کشیر اندر تصوفچ تاریخ تہ تحریک تہ کاشرین صوفی شاعرن متعلق چھے میانی ٹاٹھی مرشد رنجور تلگامی صابنی کتاب “گاشو ستھ گاش وندایو” لیکِتھ کاشرس ادبس پاراو کورمُت۔ یہ کتاب چھے تحقیی تہ تنقیدی مضمونن ہنز سومبرن یمک مطالعہ کرنہ سٕتی صوفیانہ لَیہ سٕتی تعلق تھاون والن علاوہ عام لُکن تہ فائدہ واتہ۔رنجور صأبن چھے اتھ کتابہ منز واریاہن مسئلن گن کٔڈمژ یمہ ساتین یہ کتاب بڑہ مزہ دارتہ ميٖٹھ چھے بنیمژ۔کشیرِ منز چھے اتھ سلسلس وُنتہ مزید وُسجار تہ دل دِنچ ضرورت نظرِ گژھان۔
توے چِھ کاشر ادیب تہ قلمکار اتھ موضوعس پیٹھ قلم تُلان رودِمتی تہ وُنکینس چھے اتھ فلسفس پیٹھ کہی یا کتابہ موجود یمن منز پروفیسر رشید نازکی صأبنہ زٕ کتابہ “سریت” تہ “ریشُت تہ سانی ریش” امین کامل صابنی کتاب “روحانی فلسفہ” عبدالخالق شمس صابنی کتاب “صوفیت” تہ پروفیسر غلام محمد شاد صابنی کتاب “تصوف” علاوہ بییہ تہ کینہہ کتابہ قابل داد کتابہ چھے.کاشر سکالر ہ کن اتھ موضوعس پیٹھ تحقیق کرتھ تہ یہ موضوع عام لُکن فکرہ تارنچ کوشش کرنس ساتی ساتی ریسرچ سکالرن تہ اتھہ روٹ کرتھ۔
