بشیر اطہر
7006259067
کٔشِیر چِھ واریاہ تھدِ تہ بڑِ پایکی ادیب ،مفکر،قلمکار ،نقاد تہ شاعر پادٕ کرمتی یمو پنہ نیو وصفو ساتی سانین بزرگن ہندی دل رنزٕناوی متی چِھ از تہ چِھ یِتہ کہی یا شاعر تہ قلمکار موجود یمہ پنہ نہ فنہ اسہ پانس کُن مائل چِھ کران یموے منزٕ چُھ اکھ بہترین شاعِر یوسف سمیم سند ناو سانین زبانین پیٹھ۔یوسف سمیم چِھ تُرواہ اگست کنوُہ شتھ تہ ارونزاہ عیسویس منز امرگڈھ سوپورہ مرحوم محمد اکبر وار سندِس زمیندار گھرس منز زامتی. یوسف سمیم چِھ اکہ انجمن ہندی روح رواں یوسہ انجمن بزم شعر وادب شمالی کشمیر کہ ناوٕ مشہور چھے اتھ انجمنہ تحت چِھ یمہ ادبہ خاطرٕ واریاہ کامہ انجام دوان تہ نَوِ پُیہ ہندین قلمکارن تہ شاعرن حوصلہ افزائی تہ کران. یوسف سمیم چُھ کاشِرِ ادبُک اکھ ژُخی در یمہ چھ ہمیشہ ادبس راچھ کران.یمہ چِھ پانہ تہ شاعر مگر باقین لوکٹین شاعرن چِھ پنُن اتھہ تھاوِتھ تہ چِھکھ اتھہ رٔٹتھ پانس ساتی پکہ ناوان. یمن ہُند لوکٹین قلمکارن تہ شاعرن لول برُن چُھ تعریفن لائق.یوسف سمیم سنز شاعری چھے سماجس سام ہیوان تہ امکین امکاناتن ٹھور کرنس منز پننہ شاعری ساتی تھوپ دوان تہ فرماوان..
نیہ نیہ خصلژ دوہے ننان انسانس منز
موکھ زن مولونی تراوِکھ بیہ تہ دکانس منز
چانہ شہارے گاڈین منز نوی نغمہ چلان
ونی تہ حیا کنہ پہڑن پیٹھ زانپانس منز
یوسف سمیم چِھ تمے باغک اکھ پونپر یتھ باغس واریاہو بہلہ پایہ کیو سگ چُھ دُیتمت تہ چِھکھ نٔوی نٔوی پوش باغس منز پھولراومتی۔ یمن چُھ شاعری کرنُک بِتُر تہ سیاد تہ سادہ الفاظن منز شاعری کرُن چُھ یمن مشغلہ۔یمہ چھہِ دغابازی ہندیو وتو دور تہ ادبی خیانت تہ چاپلوسی نِش چِھ یمہ بیون تہ بِدون.ییمُیک نہ کٔشیٖرِ منز کانہہ تصوُرے چُھ میلان.یمن ہنزِ شاعری منز چھنہ سخت الفاظ، سنگین استعارہ یاکنایہ نظر گژھان بلکہ چُھ یمن ہُند اصلوب سیاد تہ ساد ییمہ کِنی یہنز شاعری ہر ٲکس چھے ٹارِ کھسان۔ ولو یوسف سندؠن کینژن شعرن کُن کرو نظر زِ
بند مکانن دارِ بر کیاہ کیاہ ونے
أندرہ دم پُھٹی کینہہ نفر کیاہ کیاہ ونے
مرہمچ کتھ کانہہ اکھا چُھنہ ونی کران
کاتہ ہن نتہ چشمہ تر کیاہ کیاہ ونے
یوسف سمیم چِھ 2019ہس منز پننی اکھ شعر سونبرن”دُبرائے” شایع کٔرتھ شاعری پرن والین ہندی دل رنزناوان۔ یمن ہنز دویم شعر سۄمبرن “نَیہ مٹھیمژ لے” چھے زیرِ طباعت تہ امید چھے زِ سو ییہ جلدی منظرِ عامس پیھ ییمہ ساتی کاشرس ادبس منز ہُریر سپد۔یوسُف سمیم چُھ پانہ لولہ کین وتن پکتھ بوزن والین تہ اُمن وَتن پکناونچ کوشش کران۔ یہ باس چُھ اسہ یمن ہنزِ کتابہ “دُبرایہ” منز میلان تہ اتھ منز شامل واریاہ غزلہ چھے پزی کِنی دلچ دُبرائہ منز ہُریر کران۔ امید چھے زِ یوسف سمیم صابنی دویم کتاب “نیہ مٹھمژ لے” یوسہ زیرِ طباعت چھے کَرِ پرن والین ہندین دلن پیٹھ راج۔یوسف سمیمن چِھ ادبچ خدمت انجام دِنس منز واریاہ ایوارڈ حاصل کرمتی یتھ منز سٹیٹ بنک آف انڈیا کہ طرفہ سرٹیفکیٹ آف اپریسیشن،مومنٹو تہ شال ،گلستان نیوز طرفہ خلعت گلستان ،معروف موٹرس طرفہ اپریسیشن سرٹیفکیٹ برائے لٹریچر تہ ادب، کیوبا انٹرنیشنل ایجنسی طرفہ کلچر تہ ادبس وتھہ بَو دنس خاطر اپریسیشن ایوارڈ تہ بزم شعر وادب شمالی کشمیرکہ طرفہ خلعت کہکشان وغیرہ ایوارڈ قابل ذکر چِھ۔خدا تھاون اسہ ہمیشہ یُہند سایہ موجود تاکہ یمہ روزن ہمیشہ ادبس آبیاری کران تہ نَوِنَوِ کتابہ بارسس انان۔
