میسر ناشاد
” صحراون سبزارچ کل “ یہ لولہ ڈألی چھِ جلیل القدر تہ کہنہ مشق شاعر تہ پروفیسر ڈاکٹر حسین شیدا صابنی۔ ڈاکٹر شیدا صاب چھِ جنوبی کشیر ہندسِ کلگام ضلعس سیتی تعلق تھاوان تہ ازکل چھِ سرینگرس منز مقیم ۔ شاعر تہ ڈاکٹر آسنس سیتی سیتی چھِ یم مرحوم رفیق صابنی فرزند تہِ یمو کاشرس ادبس گوڈنچ مثنوی ” عرفان وجود “ دژی ، وننکُ مطلب چھُ یہ زِ ڈاکٹر شیدا سنز پرورش چھِ شاعرانہ صحبتس منز سپدیامژ ۔ ڈاکٹر شیدا سنز خاص شناخت چھِ مزاحیہ شاعری تہ یہنز مزاحیہ شاعری چھِ پریتھ محفلہِ زو تہ زینت بخشان ۔ یہ شعرٕ سومبرن چھِ ٣٠٣ صفحن تہ ژورن حصن پیٹھ مشتمل ( غزلہ، نظمہ ، ٹکھ تہ ٹیوٹھ مُدر ناوکُ طنز و مزاح )۔ اتھ سیتی سیتی چھِ کینہہ حمد ، نعت تہ مناجات تہ موجود ۔ یہ کتاب چھِ ٢٠٢١ منز چھاپ سپدیامژ ۔ کتابہٕ منز چھِ رفیق راز ،رشید سرشار ، شہناز رشید، ڈاکٹر حکیم نصیر احمد شاہ تہ سرورقس پیٹھ ایوب صابر ، تہ اظہار مبشر صابنی تاثرات صفحہ نمبر ١٢ پیٹھ صفحہ نمبر ١٩ تام شامل۔ یمو قداور شخصیاتو چھِ ڈاکٹر شیدا صابس تہ یہنزہ شاعری متعلق پننی مولل خیالہ باوتھ کرمژ ۔
جین پال سارتر چھُ شاعری خارجی عنصر مانان ۔ سارترسندی مطابق چھُنہ شاعر دأخلی زبان ورتاونکُ قال بلکہ خارجی گرتس دأخلی گرتس سیتی رلاوتھ أمیوک خد و خال بدلاوتھ زبانی ہنزِ ترقی منز کلیدی کردار ادا کرن مگر یہ عمل چھِ غیر دانستہ طور سپدن ۔ شاید چھِ سارترسندی وقتہ ڈاکٹر شیدہس ہیون قداورنادانستہ زبان سازن ہندُ عروج اوسمتُ ۔ ہرگاہ کتابہ ہندس آخری حصص پیٹھ نظر تراوو ، ڈاکٹر شیدا چھُ تابڑ توڑ انگریزی ردیفنُ ہندُ ورتُن کرن درینٹھی گژھاں ۔ ڈارلنگ او ڈارلنگ ، چکن ، مےَ لو ، تھینک یو وغیرہ ہیوی الفاظ چھُ اتھ اندازس ورتاونہ آمتی زِ زنہ چھِ ہوبہو یم کاشری الفاظ ۔ اتی چھُ پےَ لگاں زِ ڈاکٹر شیدا چھُ پننہِ عہدکُ جلیل القدر شاعر تہ سو شاعر یمسندُ ذکر تہ تقلید سارتر چھُ کرن ۔ جان کیٹس تہ چھُ یتھوی ہیو بیانیہ ہیتھ درینٹھی گژھاں ۔ جان کیٹس چھُ مانان زِ شاعر چھُ تتو کال شاعر یوت کال تمسِ نش شاعری تتھ پاٹھی نیرِ یتھ پاٹھی کُلسِ چھُ پن نیرن ۔ تکیاز جان کیٹس چھُ ماناں زِ بُت لہِ ہنزی شاعری چھُنہ زانہہ تھک گژھن ۔ دوہ تہ راتھ چھُ تیلے بنن یلہِ بُتلہِ اندری اکھ گرمی چھِ یعنی شاعرس گژھِ اندرہ تخلیقی گرمی لازمی آسنی ۔ ڈاکٹر شیدا سنز شعرٕ سومبرن چھِ اکسِ حساس انسانس یہ ماننہ باپتھ قائل کرن زِ ڈاکٹر شیدا چھُ اکہِ بےمثال تخلیقی تپشہِ ہندُ مالک یس نہ یمن شعر ونن آرام چھِ دِواں کرنہٕ ۔ کم از کم میہ چھنہ پننہِ زندگانی منز ییژاہ بڑی میعاری شعرہ سومبرن وُچھمژ کینہہ ۔ یوتھ تخلیقی بِتُر چھُ اکہِ صدی پتہ پادہ سپدن یسُ قأبلِ رشک چھُ آسن ۔
وننہ چھُ یوان نظم چھِ لذت پیٹھ شروع تہ حکمتس پیٹھ ختم سپدن ۔ صفحہ نمبر ٢٣٨ پیٹھ “ اکھ ژیوہ ” ناوچہِ نظمہٕ ہندُس آخری حصہ پیٹھ تراوو نظر
” وولہ پان وندے دوئے خار کرے
بس اکھ کتھ میانی مان مگر
دِم واپس لوکچارکُ اکھ ژیوہ “
صفحہ نمبر ٢٤٤ پیٹھ بے ” الماسکُ نگ “ ناوچہِ نظمہ ہندُ آخری حصہ یتھ پاٹھی ۔
” کنہِ فول ہیو سنہٕ ہس کھوربانس
تھود تُلہِ ہم لژھِ منز پھوکھ دیہم
ادٕ ننہِ ہس ۔۔۔۔ نگ چھُس الماسکُ
یُس کس تاں راجس واجہِ پیومتُ “
ڈاکٹر شیدا چھُ قاریس لذت کہِ پاتال پیٹھ حکمت کسِ آسمانس تام واتناویتھ پننہِ نظم گوئی سیتی دل ہارناون ۔ اکھ بڑی خوبی چھِ ڈاکٹر شیدا صأبس منز یہ زِ یم چھِ نظم گوئی تہ غزل گوئی ہندس لفظیاتس منز تمیز کرن یس مشکلن تہ تبرکاً چھِ کانسہ کانسہ منز لبنہٕ یون ۔ یلہٕ میہ کانسہ گونمات سندی قد و قامتکُ پتہ آسہِ لگاون بہ چھسُ تسنز نظم پرن ۔ لفظیات ، تسلسل ، تخیل تہ اسلوب چھُس بہ نظم گوئی منز وچھن۔ اتھ چھُ اکھ بنیادی وجہ یہ زِ غزل گوئی منز اکھ شعر ونیتھ چھُ مضمون مکمل سپدن مگر نظم گوئی چھِ سدری تہ سیکلُ امہٕ اندازہ رلاون زِ سیکھ تہ آب گژھن یتھی باسنی یوتھ نم تہ ماز چھُ باسن اکھ اکسِ تابع اگرچہ یم متضاد چھِ ۔
افلاطونس نزدیک چھُ عشقس منز گرفتار پریتھ کانہہ شخص شاعر ۔ولیم وارڈسورتھ چھُ مانان شاعری چھِ احساساتن تہ جذباتن ہندُ بے ساختہ بہاو ۔ ارسطور چھُ شاعری تاریخ کھوتہ بہتر تہ فلسفانہ مانن تکیاز شاعری چھِ تاریخ کھوتہ زیادہ عالمگیر اظہارکُ ناو۔ یمِ کینہہ غزلیہ اشعار وچھیو ۔
اگر شیدا تگی لیکھنُ رُتُے رُت
کری دنیا ژہ تیلہِ شاباش پانَے
حد میہ ونتم نظرِ ہندُ اسمان چھا
ہے متیا سور مژر عرفان چھا
کانہہ اکھا چھا پنُن تہِ در دنیا
خاص رشتن ژھیناں چھُ پن بعضے
نفسہٕ کِس گُری سُے سوأریا کر ہُکُن
ضائع یوکُن گیہِ جوأنی کیاہ کرو
میہ نیوتھم ہوش رویس پردہ تُلی تھےٕ
نظر تراوِتھ چلاوتھ کیازِ کرتل
ژہ لبہکھ کینہہ نہٕ منز سورُے مگر ہے
ژہ ما سیود سونچکسِ سدرس تراں چھُکھ
کُن طوطہ دوہ دارِ ہنگس پیٹھ چھُ ژٹاں پانے
دَے زانہِ تسنز ہار کتھ وأران ونس لجی
ڈاکٹر شیدا چھُ آفاقیموضوعاتن زیو دِون وول شاعر ۔یُس حقیقت پسند آسنس سیتی جدت طراز ، غزل گوئی پیٹھ یدِ طولیٰ تھاون والین صفِ اولٕکین شاعرن منز شمار چھُ سپدن ۔ یمن چھِ علمِ عروض ، علمِ بیان وغیرہ پیٹھ وسیع نظر ۔ یہندی اکثر بیشتر اشعار چھِ کثیر معانی ۔ اگرچہ ڈاکٹر شیدا چھُ قداور مزاحیہ شاعرن منز شمار تتھے چھِنہ شاید میہ ہیوی واریاہ یہنزہ سنجیدہ شأعری نش زأنیاب ۔ ڈاکٹر شیدا سنز شاعری منز چھِ جایہ جایہ صوفیانہ میچھر تہِ لبنہٕ یون ۔ ڈاکٹر شیداہس متعلق لوب میہ بیاکھ اکھ پہلو سُہ گو موضوعاتی شاعری یس پہلو نہ ونس تام دریافت اوس آمتُ کرنہٕ ۔ کلہم کتاب پرِتھ چھُ یتہِ باسان زِ ڈاکٹر شیدا سنز شاعری چھِ حالاتن تہ سماجی ناانصافی ، استحصال تہ نابرابری ردِعمل ۔ یم کینہہ شعر چھِ یہ حقیقت ماننہٕ باپتھ کافی ۔
بےخطا کُستام مورُکھ سڑکہِ پیٹھ
یتھنہٕ ملئی انہس کفن یتہِ مارنےَ
کوت دیہم مولوی چھُس کتھ ونےَ
کانہہ خدائی کام چھا باپار روس
تس چھِ ڈجمژ عقل کھستھ تختس
تس چھ باساں خلق چھِ ساری چاری
مودی کاتیاہ یی چھُ لیکھت پریتھ صفحس
رژی خبر ہیتھ کر یتیکُ اخبار اوس
بے اکہِ منفرد پہلو باپتھ وچھیو یم زہ شعر وچھیو
پیر باساں چھُ سارنے شیدا
کیا پتا چھا نہ چھا ژہ کیا کرہس
کور میہ ییمہِ ساعتہ احتساب پنُن
برونٹھ کنہِ وُچھ میہ اضطراب پننُ
ونہِ وچھیو مرزا غالب تہ قتیل شفائی سندی یم زہ شعر۔
یہ مسائلِ تصوف یہ ترا بیان غالب
تجھے ہم ولی سمجھتے جو نہ بادہ خوار ہوتا
غالب
جاگا ہوا ضمیر وہ آئینہ ہے قتیل
سونے سے پہلے روز جسے دیکھتا ہوں میں
قتیل شفائی
یم اشعار چھِ ژینون تمنِ نام نہاد ادیبن تہ نقادن یم کأشرِ شاعری پتھ کھور شأعری چھِ مانن ۔ یم شعر چھِ یہ برملا وننہٕ باپتھ کافی زِ کاشر شاعری چھِ جدید عالمی شاعری ہم پلہ ۔ اکسِ صاحبِ زیرک قأریس باپتھ چھُ کتابہِ منز بھرپور مرکب غذا ۔ میہ نزدیک چھِ یہ زندہ حقیقت تہ میہ نش چھنہ کانہہ دویم رائے۔
یودوئے افلاطون چھُنہ شاعری منز طنز پسند کرن مگر سانس برصغیرس منز چھِ شاعری اڈلیچ اگر نہ طنز و مزاح شامل آسہِ ۔ شاید چھُ امیوک بنیادی وجہ خطس منز زُون واجنی صدین ہنز اکھ طویل مایوسی روزمژی تہ یمن مایوس دلن رنزناونکُ تہ اسناونکُ ذمہ دار چھُ بر ضغیرک شاعر بنیومتُ ۔ بہ کرہ نہ ڈاکٹر شیدا سندسِ طنز و مزاحس پیٹھ کانہہ کتھ ۔ اگر توہی میہ مجبور کریو بہ ونہو ” تصرف چھیا “ ۔ ڈاکٹر شیدا صأبن چھِ رلہٕ مِلہ موضوعاتن پیٹھ ٹُکھ تہ لیکھمتی تہ امیوک چھُ باضابطہ اکھ حصہ کتابہٕ منز موجود صفحہ نمبر ٢١١ پیٹھ ٢١٥ تام ۔ ٹُکھ چھِ مقبلچ شاعری تکیاز ین واجنہِ پویہ آسہِ نہ مکمل غزل پرنس یا بوزنس باپتھ وقت ۔
کمی تام چھُ ونمتُ شاعر ہیکہ کینہہ تہ برداشت کرِتھ مگر مسِ پرنٹ نہ کینہہ ۔ کتابہٕ منز چھُنہ کُنہ تہ جایہ مسِ پرنٹ ۔ کتاب چھِ خوبصورت مگر پرنہٕ باپتھ چھِ موجودہ دورس منز قأریس باپتھ ہنا گوب پہم ، شاعری چھِ رژئے رژی ۔ میون دعویٰ چھُ زِ اکسِ سنجیدہ قأریس باپتھ چھُ سرورقہٕ پیٹھ سرورقس تام بھرپور غذا ۔ ڈاکٹر شیدا چھُ اکھ منفرد صاحبِ اسلوب شاعر ۔ اگر میانی پاٹھی توہی موڈ سوینگ آسہِ گژھن تیلہٕ چھِ ” صحراون سبزارچ کل“ تُہندٕ باپتھ کارآمد تکیاز توہی میلہِ موڈہ حسابہ سورے کینہہ ۔ کتاب پرِتھ گژھِ مصنفس تام پننی قیمتی رائے واتناونی ۔ یہ چھِ أکی انسانن پننہِ قلیل زندگی ہندُ قیمتی وقت صرف کورمُت ۔ اگر خدانخواستہ پسند یی نہ ، گوڑ چھنہ سوہ کتھئے کانہہ ونہٕ ماچھ چھُ ٹیوٹھ ۔ تیلہ چھُ ڈاکٹر شیدا پانے ونن ۔
ٹارِ نےَ کھسہِ ٹھاسی تن شیدا لبن
نعوذ باللہ شاعری قران چھا
������
میسر ناشاد۔۔۔7006885446
