کـــربــلا
حاجی نور محمد ڈار پوچھل پلوامہ
دیٖن روشن کوٗر حُسینن باخدا
تتھ گواہ چھِ تا قیامت کربلا
کورن دین زندہ ابتداء تا انتہا
تتھ گواہ چھِ تا قیامت کربلا
نام پیغام سوز حسینس کوٗفیو
انیو تشریف بیعت چأنی أس کرو
کیاہ خبر أسس تمن کیا چھُ مدعا
تتھ گواہ چھِ تا قیامت کربلا
بُوز تھی پیغام تِمو ہیوت سکھرُن
چچہ بابن تس حُسینس کُن ونن
پھیر واپس بوٗز میونی مشورہ
تتھ گواہ چھِ تا قیامت کربلا
تَم حُسینن چچہ بابس کُن وُنن
أس گژھو توٗر أسہ چھا تتہ جنگ کرُن
دیٖن حق یُس بایہ تس رأز چھِ خدا
تتھ گواہ چھِ تا قیامت کربلا
مکہٕ پیٹھے قأفلہ یام دراو تور
تَم یزیدن بوُز تاما تُلُن شور
فوج سومبرن فتنہ کرُن برپا
تتھ گواہ چھِ تا قیامت کربلا
دوپ یزیدن کوفین چُھ بزدلا
مکہٕ کین ہز بیعت کرن چھا روا
تریش بند کرہوکھ گژھن شہید بے قضا
تتھ گواہ چھِ تا قیامت کربلا
دُوپ یزیدن فوج سی کُن تھاویو غور
پہرِ دیو دریائے فراتس ژپور
یتھ نا یمو منز تریش نیو کانہہ اکھاہ
تتھ گواہ چھِ تا قیامت کربلا
حض سکین خیمسی منز أس روان
چچہ بابس کُن سہِ تامت أس ونان
تریش بند کرکھ اسہ وِنتو کیا خطاہ
تتھ گواہ چھِ تا قیامت کربلا
حض عباس تریشہ باپت یام دراو
مشق ہتھ دریائے فراتس پیٹھ سُہ آو
تیر لأیس نرٕ دونوے گیے جدا
تتھ گواہ چھِ تا قیامت کربلا
تم حُسینن یام اصغر تھود تُلن
خونِ دردس رٹتھ آسمان تم چُھکن
بأطلس لتھ دین حقس پیٹھ فدا
تتھ گواہ چھِ تا قیامت کربلا
یام حسین دلدلس پیٹھ نیوک سوار
جنگ کرنے دراو میدان کارِزار
پُورن فتحٌ کریم نصرٌ مِن اللہ
تتھ گواہ چھِ تا قیامت کربلا
تِمو بدبختو تیراہ دِیوتھ بٔرتھ
تھرٕ پیٹھہِ زن گلابا پیو ہَرٕتھ
سمٕتھ أیس سرِ ناز کورہس جدا
تتھ گواہ چھِ تا قیامت کربلا
اے خدا چُھک مالکِ ارض و سما
ٹوٹھ اوسی نا خاندانِ مصطفیٰ
روز محشر نائی لاگی حض فاطمہ
تتھ گواہ چھِ تا قیامت کربلا
کیاہ بنیو تِمن اہل بیت نی
شیر خوارن بییہ تِمن معصوم نی
نوؔرِ وچھتو بے عارس عار چھا
تتھ گواہ چھِ تا قیامت کربلا
