نوجوان نسل کو تباہ کرنے کی سازش ہرگزبرداشت نہیں کی جائےگی/ شاہنواز چوہدری
پونچھ/ندائے کشمیر/جاوید اقبال اسدؔ
مرکزی زیرِ انتظام جموں و کشمیر کے سرحدی ضلع پونچھ کی تحصیل سرنکوٹ کی پوٹھا پنچایت میں شراب کی دوکان کھولے جانے کے خلاف وہاں کی عوام، منتخب پنچایتی نمائندگان، ضلع ترقیاتی کونسل کے ارکان و سابق ایم ایل اے نے احتجاج درج کرواتے ہوئے اس فیصلہ کو واپس لینے کا مطالبہ کیا ہے۔اس سے قبل علماء کرام و دیگر سیاسی و سماجی کارکنان نے بھی اپنا احتجاج درج کروایا تھا جس کے بعد شراب کی دوکان کھلنے پر کوئی پیش رفت نہیں دکھائی دی تاہم ہم عوام اس مسئلہ کو لیکر آگ بگولہ ہے اور سیاسی لیڈران و متعلقہ ضلع ترقیاتی کونسل کے ارکان کے پیچھے صف بندی کر یک زبان ہوکر سرکار سے مطالبہ کیا ہیکہ وہ سرنکوٹ میں شراب کی دوکان کھولنے کی ہرگز اجازت نہ دیں۔رکن ، ضلع ترقیاتی کونسل پونچھ ، شاہنواز چوہدری نے ذرائع ابلاغ کے نمائندوں سے مخاطب ہوتے ہوئے بتایا کہ یہ یہاں کی نوجوان نسل کو تباہ کرنے کی سازش کی جارہی ہے جس کو وہ ہرگز برداشت نہیں کریں گے۔انہوں نے کہا کہ ضلع ترقیاتی کونسل کے ارکان، متعلقہ پنچایت کے سرپنچ و دیگر منتخب نمائندگان بھی موجود ہیں اور انکو پوچھے بنا ہی زبردستی یہاں پر شراب کی دوکان کھولی جارہی ہے جو ایک غیر جمہوری و غیر آئینی عمل ہے اور وہ اور یہاں کی عوام سرنکوٹ اے کے علاقے میں کسی بھی قسم کی شراب کی دوکان کھولنے کی ہرگز اجازت نہیں دیتے ۔انہوں نے ایل جی منوج سنہا و ضلع انتظامیہ کو صاف و سخت الفاظ میں کہا ہیکہ وہ یہاں شراب کی دوکان کھولنے کی ہرگز اجازت نہ دیں ورنہ بڑے پیمانے پر احتجاجی مظاہرے کئے جائیں گے اور قانونی طریقے سے بھی اس لڑائی کو بخوبی لڑیں گے۔