علی شیدا
حرفہ حرفس جواب ہیتھ واپس
دراو ناجی کتاب ہیتھ واپس
شوقہ آدم گری تلاں پرسان
ہوشہ لفظو براں پنن جزدان
ژھایہ لیکھان داستاں وقتچ
مایہ شیران گاشہ لئر بختچ
نکتہ سونبران پختہ کارن ہندئ
ساز پاران آبشارن ہندئ
آنگنن دِتھ گژھان شرئ باشے
راش علمچ تہ گاشہ سرئ آشے
ژأنگئ زالان نہہ گٹن اندر
گاش ہاوان ژھٹن وٹن اندر
تلمہ سونبران گامئ گامس سُے
معنہ ژاران خواب نامس سُے
سوخنہ باجین کتھن براں سرگم
حرفہ یارن پکان سُے ہمدم
زندگی ہند سراب ویژھنوون
سطرِ سطرے نصاب انزروون
سادگی ہند لباس لاگتھ دراو
تھزر و بجرک ولاس چھاوِتھ دراو
موختہ تھوون کتھل جرتھ ورقن
شولہ نوون کشیرہ شعرک فن
گندنہ تھاوِن شُرین نبکئ تارکھ
ناو پرووُن ” شُرین ہُند ناجی”
سانہ ادبچ رقم کرن جدول
نظم و نثرس مثالئ باوژبل
کیتئ رأمتئ خزانہ گئے دسئ یاب
ناگرادو سیکلئ سپدئ سیراب
آو کاغذ قلم تھوون شیرِتھ
دراو ناجی کتاب ہیتھ واپس
