57

شہد ہے شبنم ہے اور شہنائی ہے اُردو زباں

اُردو زبان
نیاز جَی راجپُوری

شہد ہے شبنم ہے اور شہنائی ہے اُردو زباں
شیریں ہے شفّاف ہے سُکھ دائی ہے اُردو زباں
ہِندو مُسلِم سِکھ عیسائی سبھی کی ہم نشیں
سب اِسے اور سب کو ہی راس آئی ہے اُردو زباں
ہے یہیں جنمی پَلی دامن میں ہِندوستان کے
کون کہتا ہے کہیں سے آئی ہے اُردو
دیکھئے عینک ہٹا کر بُغض و نفرت کی جناب
چھا رہی ہے چھائے گی اور چھائی ہے اُردو زباں
قومی یکجہتی اخوت پیار جِسکے رنگ روپ
وہ ہی تو کہلاتی میرے بھائی ہے اُردو زباں
جنگِ آزادی میں بھی اِس کا کلیدی رَول تھا
جو ہے جَگ ظاہِر وہی سچّائی ہے اُردو زباں
کل تھی ، اِنشاء اللہ کل بھی یہ رہے گی تازہ ہی
حیف ! صد حیف !! آج جو مُرجھائی ہے اُردو زباں
شخصیت میں چار چاند آکر لگا دیتی ہے یہ
ہے شعور و فہم اور دانائی ہے اُردو زباں
ذہن ودِل میں خیمہ زن بَن کر بہاروں کی سفیر
رُوح افزا جاں فزا پُروائی ہے اُردو زباں
ہے دھنک کے سات رنگوں کا نُمایاں اِمتزاج
دِل کشی ہے ، حُسن ہے ، رعنائی ہے اُردو زباں
رقص کرتے ہیں حسیں خوابوں کے خاکے آنکھوں میں
نیند کی خُوشبو کہیں سے لائی ہے اُردو زباں
ذہن و دِل لُطف و لطافت سے ہُوئے ہیں مالا مال
جب سے مجھ کو تھوڑی تھوڑی آئی ہے اُردو زباں
ماں کی ممتا سے تو مَیں بچپن سے ہی محروم ہُوں
اب تو لگتا ہے کہ میری مائی ہے اُردو زباں
ہے جہاں اُردو وہاں رونق ہی رونق ہے نیازؔ
زیب ہے ، زیبا ہے اور زیبائی ہے اُردو زباں
٭٭٭
Neyaz Jairajpuri
67, Jalandhari,
Azamgarh – 276001 ( U.P.) India
Mobile: 0091 9935751213 / 9616747576
Email: njairajpuri@gmail.com

اس خبر پر اپنی رائے کا اظہار کریں

اپنا تبصرہ بھیجیں