شدید مخالفت کے باوجود ٹرک کیبن اب لازماً ایئر کنڈشن ہونگے

نوٹیفکیشن کے مسودے کی منظوری دے دی گئی،وزیر ٹرانسپورٹ کا اعلان

سرینگر//7جولائی/ / مرکزی وزیر ٹرانسپورٹ نتن گڈکری نے اعلان کیا ہے کہ ٹرکوں کے کیبن میں ایئر کنڈیشننگ سسٹم کی تنصیب کو لازمی کرنے کے مسودہ نوٹیفکیشن کو منظوری دے دی گئی ہے۔ مرکزی وزیر نتن گڈکری نے ٹویٹ کیا کہ تیار کردہ مسودہ میں N2 اور N3 کیٹیگریز کے ٹرک شامل ہیں۔ٹی ای این کے مطابق N2 اور N3 درجہ سے تعلق رکھنے والے ٹرکوں کے کیبن میں ایئر کنڈیشنگ سسٹم کی تنصیب کو لازمی کرنے کے لیے مسودہ نوٹیفکیشن کو منظوری دے دی گئی۔ سڑک کی حفاظت کو یقینی بنانے میں ٹرک ڈرائیور اہم کردار ادا کرتے ہیں۔ سڑک، ٹرانسپورٹ اور ہائی ویز کے مرکزی وزیر نے کہا کہ یہ فیصلہ ٹرک ڈرائیوروں کے لیے کام کرنے کے آرام دہ حالات فراہم کرنے میں ایک اہم سنگ میل کی نشاندہی کرتا ہے، اس طرح ان کی کارکردگی کو بہتر بناتا ہے اور ڈرائیور کی تھکاوٹ کے مسئلے کو حل کرتا ہے۔پچھلے مہینے، وزیر نے کہا کہ ٹرک ڈرائیور ٹرانسپورٹ کے شعبے میں کلیدی کردار ادا کرتے ہیں جو ہندوستان کے لیے سب سے اہم شعبوں میں سے ایک ہے، اور ان کے کام کے حالات اور دماغی حالت سے متعلق مسائل کو حل کرنے کی ضرورت ہے۔گڈکری نے کہا تھا کہ ٹرکوں کے لیے ایئر کنڈیشنڈ کیبن جلد ہی لازمی کر دیے جائیں اس بات پر افسوس کا اظہار کرتے ہوئے کہ ٹرک ڈرائیوروں کو شدید گرمی میں کام کرنے پر مجبور کیا گیا ہے، وزیر نے کہا تھا کہ وہ کافی عرصے سے ٹرک ڈرائیوروں کے لیے ایئر کنڈیشنڈ کیبنز پر زور دے رہے ہیں یہاں تک کہ “کچھ لوگوں نے اس پر اعتراض کرتے ہوئے کہا کہ اس سے اخراجات بڑھ جائیں گے۔”