دنیا کی بہترین اور کامیاب ٹیکنالوجی کو اپنانے کیلئے تیار
سرینگر/28اپریل/سڑک ٹرانسپورٹ اور شاہراہوں کے مرکزی وزیر نتن گڈکری نے بنیادی ڈھانچے کی ترقی میں ’’معیار‘‘پر توجہ مرکوز کرنے کیلئے نئے خیالات،تحقیقی نتائج اور ٹیکنالوجی کیلئے انوویشن بینک کے قیام کی تجویز پیش کی ہے۔سی این آئی مانیٹرنگ کے مطابق روڈس کانگریس کونسل میٹنگ کے افتتاحی تقریب سے ورچول طور پر خطاب کرتے ہوئے سڑک ٹرانسپورٹ اور شاہراہوں کے مرکزی وزیر نتن گڈکری نے کہ آئی آر سی سے نئے اقدامات کی توقع ہے، تمام انجینئرز کے لیے انوویشن توجہ کا مرکز ہونا چاہیے۔ انہوں نے کہا کہ اائی آر سی کو دنیا میں آئی آئی ٹی اور عالمی اداروں کی مدد سے ایک عالمی معیار کی جدید ترین لیبارٹری تیار کرنی چاہیے۔ روڈ ٹرانسپورٹ اور قومی شاہراہ کے مرکزی وزیر نتن گڈکری نے کہا کہ ہندوستان کو 5 ٹریلین ڈالر کی معیشت بنانے کے وزیر اعظم نریندر مودی کے ویڑن کو پورا کرنے میں بنیادی ڈھانچے کی ترقی کا اہم کردار ہے۔سڑک کے بنیادی ڈھانچے کا براہ راست تعلق اس خطے کی خوشحالی سے ہے۔ انہوں نے کہا کہ سڑک کا بنیادی ڈھانچہ لوگوں، ثقافت اور معاشرے کو جوڑتا ہے اور سماجی و اقتصادی ترقی کے ذریعے خوشحالی لاتا ہے۔ انہوں نے کہا کہ ہماری حکومت قومی شاہراہوں کے نیٹ ورک کو 2025 تک 2 لاکھ کلومیٹر تک پھیلانے کے لیے پوری لگن سے کام کر رہی ہے۔ گزشتہ 9سالوں میں ہماری ٹیم نے متعدد عالمی ریکارڈ بنائے ہیں۔گڈکری نے کہا کہ حکومت شمال مشرقی خطے کی ترقی کیلئے بہت پرعزم ہے۔ انہوں نے کہا کہ این ایچ آئی ڈی سی ایل اس خطے میں بنیادی ڈھانچے کی ترقی میں اہم کردار ادا کر رہا ہے۔ موصوف نے کہا کہ ہم تعمیر کے لیے دنیا کی بہترین اور کامیاب ٹیکنالوجی اور نئے مواد کو اپنانے کیلئے تیار ہیں۔ انہوں نے کہا کہ ثابت شدہ ٹیکنالوجی کا استعمال اور تعمیراتی لاگت میں کمی ہمارے لیے دو اہم ترین قوتیں ہیں۔ انہوں نے مزید کہا کہ ہمیں معیار کو برقرار رکھتے ہوئے تعمیراتی لاگت کو کم کرنے کی ضرورت ہے۔
