مصنفہ : کنیز باھو۔۔۔شہر: سرگودھا
”کیسے ہو دیو ؟ “
”یہ تم کیوں ہردفعہ میرانام بدل لیتی ہو؟ کبھی چور ،کبھی فریبی، کبھی رہزن اب دیو رکھ لیا“
” تم ! بہروپیے جو ہو“
”وہ تو ہوں۔میری فطرت تبدیل ہوتی رہتی ہے۔
یہ انسان کی ایمانی قوت اور اعمال پر منحصر ہے۔“
” اتنے کمزور کیوں لگ رہے ہو؟ ۔۔۔۔۔خیریت “
” مرنے والا ہوں بس ! “
” میری پوجا جو چھوڑدی ہے کل تک میں تمھاری معبود تھی۔۔۔وہ تمہارا وزیر شیطان ۔۔۔کیا اس نے تمہیں مشورہ نہیں دیا؟۔۔۔بتایا نہیں کے میں کتنی خوبصورت ہوں۔“
” انسان حق کی ایسی پناہ میں آچکا ہے ،جہاں شیطان کا گزر نہیں ہے ۔۔۔۔وسوسے آئیں گے ،تو ہی ارادے کی مہر لگے گی اور میں تمہیں پاسکوں گا ۔۔۔۔
اب وسوسے ہی نہیں آتے ۔۔۔۔عشق حقیقی کی آگ جل رہی ہے اس کے سینے میں۔۔۔۔۔۔۔ جو تمام وساوس اور دنیاوی خواہشات جلارہی ہے ۔“
” اچھا! تو وہ اب عاشق بن گیا ہے۔ہم دنیاوی خواہشیں تو اس کی ٹھوکر پر ہیں۔ “
”یاد ہے جب وہ میری سواری تھا ہم نے اسے کیسے سر تاپائوں جکڑ لیاتھا۔۔۔۔۔۔میں آزاد بادشاہ اس پر حکمرانی کرتا اور وہ میری غلامی ۔۔۔میں نے اسے اندھا کر رکھا تھا خواہش ۔۔۔۔۔۔ اسے میرا فریب نظر نہیں آتاتھا ۔۔۔۔
وہ مجھے اپنا بہترین دوست سمجھتا رہا۔ “
”تو کیا اس نے تمہیں پہچان لیا ہے؟ ۔۔۔لیکن کیسے
تم تو اسے میری طلب میں گمراہ کرکے کفر کی حد تک مایوس کرچکے تھے۔“
” میرا نام نفس ،دوسرا نام کتا ہے۔ تب تک بھونکتا رہتا ہوں۔۔۔ جب تک پیاری معبود اسے تمہارا اسیر نا کردوں۔۔۔ پینترے بدل بدل کر وار کرتا رہا۔۔۔۔اپنے گرو شیطان کی شاگردی میں اسے ہربار لوٹا۔۔۔۔۔۔
لیکن جب سے اس نے رہبر بنایا ہے ہم منہ کی کھارہے ہیں۔۔۔۔۔ رہبر اسے شہسواری کے گر سیکھارہا ہے۔ “
”ھاھاھا۔۔۔۔تو تم پر لگام ڈال لی گئی ہے ۔“
”ذیادہ ہنسنے کی ضرورت نہیں ۔۔۔۔میں تو اس کی غفلت کے لمحات کے انتظار میں ہوں، وہ جیسے ہی غافل ہوا میں نے اپنا کام کرلینا ہے ۔۔۔۔۔ شیطان نے نیاحربہ سکھایا ہے مجھے ۔“
”واہ ۔۔۔۔کیا تعریف کروں تمہاری ۔۔۔۔ویسے اب تعریف تمہیں موٹا نہیں کرسکتی نفس“
”تم نے ٹھیک کہا وہ فطرت پہچان چکا ہے۔۔۔۔۔۔۔۔۔
دنیاوی جھگڑوں، سے نکل کر مجھ سے جہاد کرتا ہے۔۔۔۔۔۔ اس کی سلطنت پاک ہوگئی ہے۔“
” نفس! دل میں تو جگہ جگہ میرے بت نصب تھے ۔۔۔۔ حب دنیا کی شکل میں ۔۔۔۔۔۔۔ہم نے دل پر قبضہ کر کے مردہ کردیا تھا ۔۔۔۔۔وہ زندہ کیسے ہوا۔؟“
” مرشد کامل کی رہبری میں ذکر قلبی کرتا ہے ۔۔۔۔۔
ہر سانس کے ساتھ میری نفی اور رب کی ربوبیت کا اقرار کرتا ہے ۔۔۔۔من میں اسم اللہ ذات پاک کی بوٹی لگائی ہے مرشد نے۔ مرشد کی نگاہ سے میں مردہ اور دل زندہ ہوگیا۔“
” تو وہ تمہاری رضا کی نفی سے، رب کی رضا کی جستجو میں ہے۔“
” صحیح سمجھی…….“
” پتہ ہے جس نیت کو شیطان تمہارا لالچ دلا کر اور کبھی ریاکاری میں مبتلا کرکے ، کبھی دنیاوی منافع سے گھاٹے کا سودا کرواکر ایمان اچک لیتا تھا،وہ اب خالص ہوگئی ہے ۔۔۔۔۔اس کے اعمال صرف رب کی رضا کے لیے ہوتے ہیں ۔۔۔۔ رب کی طلب میں “
” ہاں نفس ۔۔۔رب کے مخلص بندوں پر ہی تو شیطان کا زور نہیں چلتا۔۔۔۔“
”شیطان نے بدنگاہی کا زہر میں بجھا ہوا تیر بھی مارا تھا۔۔۔۔ تمہارے فریبی حسن کی شہوت کے کونچے بھی دلائے۔۔۔اس کی نگاہیں بس رب کی متلاشی ہیں ۔۔۔۔اسے زینت دنیا نہیں لبھاتی ۔“
”پھر ہم خواہشوں کی بیڑیاں تو وہ توڑ چکا ہے ۔۔۔۔۔ واہ خاکی تیری پرواز عشق پر ہم قربان ۔۔۔۔۔۔۔وہ اپنے اصل وطن کی طرف لوٹ رہا ہے۔“
” خواہش !اصل وطن تو موت کے بعد ہی جاتے ہیں۔اسے ابھی موت تو نہیں آئی۔؟“
” وہ وعدہ نبھاتے ہوئے مرنے سے پہلے مرچکا ہے ۔۔۔۔ تمہاری فنا سے اس نے بقا کا راز پالیا ہے ۔“
”وعدہ۔۔۔۔۔ کیسا وعدہ ؟“
” عہد الست ۔۔۔۔۔۔اپنے اصلی وطن میں اس کی روح نے قالو بلی کہہ کر رب کی ربوبیت کا اقرار کیا تھا ۔“
”پھر ۔۔۔۔۔“
”پھر اللہ نے اس وعدے کی آزمائش کیلئے روح کو جسم کا لباس پہنا کر اس دنیا میں بھیجا۔۔۔۔۔۔۔۔
اس کے پیچھے ہم خواہشات۔۔۔۔۔ تمہیں اور اس کے ازلی دشمن شیطان کو لگادیا ۔۔۔۔“
” مجھے قابو کرکے مجھ پر سواری کرتا ہے اور تمہارے ہتھیار بنا کر شیطان سے لڑتا ہے۔۔۔۔میرے پاس اس کے ساتھ سیدھا ہونے کے علاوہ اب کوئی حل نہیں ہے ۔ خواہش !“
” انسان اللہ کا خلیفہ ہے، اس کیلئے ساری کائنات مسخر کردی گئی۔۔۔۔۔۔نفس تم پر حکومت سے ہی وہ کائنات کی تسخیر کرے گا۔۔۔۔تمہارا غلام ہوتا تو کہیں کا نہیں رہتا۔۔۔۔تمہیں انسان کی غلامی مبارک۔۔۔۔
اب اجازت میں چلتی ہوں “
