کورونا کے بعد رواں برس دس لاکھ مقامی اور غیرملکی عازمین کو حج کی اجازت

عازمین کو مملکت روانگی سے 72 گھنٹے قبل کرونا کا نیگٹیو پی سی آر ٹیسٹ پیش کرنا ہو گا
سرینگر /09اپریل / ندا نیوز نیٹ ورک سال 2022میں حج کے خواہشمند عازمین کیلئے بڑا تحفہ دیتے ہوئے سعودی عرب نے رواں برس 10 لاکھ افراد کوحج کرنے کی اجازت دینے کا اعلان کیا ہے۔ندا نیوز نیٹ ورک مانیٹرنگ کے مطابق سعودی وزارت حج وعمرہ کی جانب سے جاری بیان کے مطابق رواں سال 10 لاکھ عازمین حج ادا کر سکیں گے۔کورونا وبا کے باعث گزشتہ 2برسوں میں عازمین کی تعداد کم کردی گئی تھی۔رواں سال 65برس سے کم عمر افراد کوحج کرنے کی اجازت ہوگی جبکہ عازمین کے لئے سعودی حکومت کی منظورشدہ کورونا ویکسین لگوانا لازمی ہوگا۔سعودی وزارت حج وعمرہ کا مزید کہنا ہے کہ تمام عازمین حج کوسعودی عرب روانگی سے 72 گھنٹے قبل کرائے گئے پی سی آر ٹیسٹ کی منفی رپورٹ پیش کرنا ہوگی۔قابل ذکر بات یہ ہے کہ کورونا کی وبائی بیماری کے باعث گزشتہ دو سالوں کے دوران دیگر ممالک میں سے کسی بھی عازمین حج کو حج پر جانے کی اجازت نہیں ملی تاہم اس سال کووڈ کیسوں میںکمی آنے کے ساتھ ہی سعودی حکام نے حج بحال کرنے کا اعلان کیا ہے جبکہ اب عازمین کیلئے بڑی خوشخبری دی گئی ہے ، سرکاری اعداد وشمار کے مطابق گزشتہ سال 58ہزار745 عازمین نے حج ادا کیا تھا۔ کورونا وائرس سے قبل عازمین حج کی تعداد 20 لاکھ سے تجاوز کرجاتی تھی۔