سری نگر، 02مارچ //شمالی کشمیر کے بانڈی پورہ ضلع کے سمبل سونہ واری کے نسبل علاقے میں بدھ کے روز ٹینگ پورہ گرام سبھا کی میٹنگ کے دوران دو گروپوں کے درمیان تو تو میں میں شروع ہوئی جس نے جھگڑے کا رخ اختیار کیا جس کے نتیجے میں سرپنچ سمیت چار افراد زخمی ہو گئے ۔سرکاری ذرائع نے بتایا کہ سونہ واری کے ٹینگ پورہ گرام سبھا کی میٹنگ کے دوران پنچایت ممبران نے دوسرے گروپ کی جانب سے پیش کی گئی تجاویز کی مخالفت کی جس دوران میٹنگ میں موجود دو گروپوں کے درمیان لفظی جنگ شروع ہوئی جس نے بعد میں جھگڑے کا رخ اختیار کیا۔سرکاری ذرائع کا مزید کہنا ہے کہ آپسی تصادم کے دوران سرپنچ سمیت تین افراد زخمی ہوئے جنہیں علاج ومعالجہ کی خاطر نزدیکی ہسپتال منتقل کیا گیا۔انہوں نے مزید کہاکہ زخمی سرپنچ جس کی شناخت معراج راتھر کے بطور ہوئی ہے کو مزید علاج ومعالجہ کی خاطر سری نگر ہسپتال ریفر کیا گیا ہے ۔پولیس نے معاملے کی نسبت سی آر پی سی کی مختلف دفعات کے تحت ایک کیس درج کرکے مزید تحقیقات شروع کی ہے ۔علاوہ ازیں سوشل میڈیا پراس حوالے سے ایک ویڈیو بھی وائرل ہواہے جس میں زخمیوں کو ہسپتال میں مرہم پٹی کرتے ہوئے دیکھا جاسکتا ہے ۔
78
